En il Grischun èn sin palpiri las vischnancas e l’Assicuranza d'edifizis dal Grischun (GVG) responsabels per la controlla da protecziun cunter incendis. Cunquai ch'era las vischnancas surdattan – cun be paucas excepziuns – quella lavur a la GVG è quella de facto responsabla.
Tenor Marc Handlery, directur da la GVG, vegnia tar las controllas differenzià tenor tip d’edifizi. Edifizis cun gronda periclitaziun, sco per exempel magasins da tancs, vegnian controllads mintga dus onns. Edifizis cun periclitaziun speziala, sco locals gastronomics – cunzunt sch’i èn sutterrans u scha quels han ina capacitad da passa 300 persunas – vegnan controllads mintga 5 onns. Mo mintga 10 onns vegnan edifizis da biro examinads en il fratemp sch'els èn protegids cunter incendis.
5 onns paran bler, igl è dentant impurtant da savair ch'igl è la fin finala il gestiunari ch'è responsabel.
La GVG saja dentant be l’instanza da controlla. Ma il metter enturn las mesiras, scolar il persunal e garantir che tut funcziuna tenor protecziun d’incendi saja chaussa dal gestiunari u dals possessurs. Excluder in incendi na poss’ins mai, il privel sa lascha dentant minimar e quai saja ina lavur cuminaivla, appellescha Marc Handlery.
Emprender da la tragedia
La tragedia è era stada ina gronda sfida per ils pumpiers. Roland Farrér, ch'è daventà sco emprim Grischun sco president da la Federaziun svizra da pumpiers, haja immediat pensà als pertutgads ed als pumpiers cura ch'el saja vegnì infurmà la damaun da Bumaun vers las 06:00 davart ils eveniments a Crans-Montana. En l’intervista cun RTR accentuescha el l'impurtanza da l’elavuraziun ulteriura suenter quel eveniment.
El suppona ch'ils pumpiers pertutgads vegnian a duvrar pli ditg sustegn psicologic. El vegn a visitar Crans-Montana per mussar sustegn durant il di naziunal da commemoraziun da venderdi.
Roland Farrér guarda suenter sis mais en uffizi superbi sin sia rolla, che portia dentant er sfidas ed ins stoppia fixar prioritads. In success intermediar saja la meglra collavuraziun cun la coordinaziun da pumpiers da la Svizra.
Farrér vul render la federaziun pli visibla cun preschientscha en l'entira Svizra e duvrar per ils giuvens dapli ils meds socials. La recrutaziun da voluntaris saja in tema permanent, ma Farrér na vesa actualmain nagins problems pli gronds en Svizra d’occupar ils posts da pumpier.