Tgi survegn quant? Quai po vesair ora fitg different – tut tenor quant bain che la famiglia stat finanzialmain. Sin basa da la decleranza da taglia vegniva fin ussa direct fatg giu tranter la canorta e l’uffizi social quants supplements che mintga famiglia survegniva. Quai funcziunava quasi automaticamain. Il sulet ch’ils geniturs stuevan far: dar il consentiment a la canorta da pudair guardar la declaranza da taglia.
Tge è nov?
Cun la revisiun da la lescha, ch’è vegnida approvada dal Cussegl grond e lura – fin avrigl – vegnida concludida da la regenza, na survegnan ils geniturs betg automaticamain tut ils supplements d’uffants sco fin ussa. A partir da l'avust ston las famiglias activamain tschentar la dumonda a l'uffizi social per dapli sustegn finanzial. Uschiglio vala ina reducziun minimala da 25% dals custs.
Munta: uss ston ils geniturs s’annunziar sin l’applicaziun online cun num «quint». Quai è ina applicaziun dal chantun, nua ch’ils geniturs pon lura tschentar la dumonda per dapli sustegn finanzial.
Co vegnan ils geniturs tar quella applicaziun «quint»?
La canorta ha gia automaticamain annunzià l’uffant tar il chantun. Sinaquai han ils geniturs survegni in e-mail ubain in sms dal chantun cun tut las infurmaziuns necessarias. Tranter auter era cun la supplica da sa registrar enfin la fin da fanadur sin l’applicaziun da «quint». Quai pon ins far direct sur il link en il sms u e-mail.
Il login sin «quint» è fatg. Tge è ussa da far sin questa applicaziun?
Ina giada ch’il login è fatg – quai va fitg simpel – pon ins lura adattar il profil. Per exempel pon geniturs chargiar si ina fotografia ubain adattar l’adressa etc. Dal reminent è gia tut emplenì correctamain.
Per inoltrar la dumonda pon ins ussa cliccar sin il nuf cun num «Vergünstigungen 2025/2026 Betreuung in Graubünden».
Impurtant è lura d’eleger la segunda opziun «Gesuch für Prüfung auf erweiterte Vergünstigung einreichen». Cun tscherner questa opziun dattan ils geniturs il consentiment al chantun da pudair resguardar la decleranza da taglia. Uschiglio vala – tut tenor- simplamain ina reducziun minimala da 25% dals custs da la canorta.
Qua è il crutsch
Ed ussa adatg: Quai che para sin l’emprima egliada cumplitgà – è da princip fitg simpel:
Cura ch’ins ha cliccà sin «weiter» vegn sco davos ina mascra cun trais caums. Uss èsi – per tuttas e tuts che fan ina decleranza da taglia ordinara – simplamain da cliccar sin «Ordentlich» e tut il rest pon ins laschar vid. Il segund caum cun il num «Einkommen aus vereinfachtem Abrechnungsverfahren» vala mo per famiglias cun impiegads als quals ch’ins paja la cassa da pensiun. Per ils blers vala uschia: ins sto gnanc chargiar si documents.
Tge è il facit?
L’entir process è propi simpel. Cun trais clics è quella chaussa schon liquidada. Impurtant è: da betg emblidar da far il login sin l’applicaziun cun ils num «quint» per uschia inoltrar la dumonda per dapli sustegn. Uschiglio vala simplamain ina reducziun minimala.
Schegea ch’il chantun ha dà fadia da crear instrucziuns, para il nov sistem tuttina anc da chaschunar irritaziun tar in u l’auter genitur. RTR ha contactà l’uffizi social, sinaquai ha lez ditg ch’els èn conscients da tschertas sfidas. L’uffizi vegnia ussa a rimnar tut ils puncts che n'èn betg clers per lura adattar quai uschè spert sco pussibel.