Siglir tar il cuntegn

Header

audio
La finala ha Martin Bühler fatg dapli vuschs che Urs Marti
Or da Actualitad dals 07.10.2021.
laschar ir. Durada: 2 minutas 53 Secundas.
cuntegn

Surpraisa tar PLD Martin Bühler duai succeder a Rathgeb

Cun Martin Bühler vul la partida defender il sez da cusseglier guvernativ Christian Rathgeb che sto chalar pervia da la limitaziun da temp d'uffizi. La Partida liberaldemocratica dal Grischun ha nominà sco emprima ses candidat per il carussel d'elecziun. Proxim matg decida il suveran.

video
Martin Bühler duai succeder a Christian Rathgeb
Or da Telesguard dals 07.10.2021.
laschar ir. Durada: 3 minutas 52 Secundas.

Ils delegads e las delegadas da la PLD han stuì nominar ina persuna che duai candidar per in sez en la regenza e betg per dus candidats, quai sin dumonda da la direcziun da partida. Martin Bühler è sa mess tras cunter la suletta dunna Vera Stiffler ed ils dus politichers cun experientscha Urs Marti e Maurizio Michael.

Martin Bühler – carriera e scolaziuns

Avrir la box Serrar la box

Carriera:

  • dapi 2016: directur da l'Uffizi da militar e da protecziun civila en Grischun
  • 2013-2016: manader da la partiziun finanzas e servetschs e commember da la direcziun da la Scola auta da pedagogia dal Grischun
  • 2008-2013: manader da project e collavuratur scientific en la partiziun da relaziuns internaziunalas e protecziun tar il Departament federal da defensiun, protecziun da la populaziun e sport
  • 1998-2008: Scolast primar a Thalwil e Zollikon

Scolaziuns:

  • 2015: Executive Master of Business Administration – General Management a la HTW Cuira
  • 2010: Master da l'Universitad Turitg en politologia cun approfundà relaziuns internaziunalas e filosofia politica
  • 1997: Patenta da scolast, Scola media evangelica a Schiers

El ha colliaziuns tar la Scola media evangelica da Schiers ed è commember da la suprastanza da la Fundaziun militar-istorica dal Grischun. Plinavant è el il figl dad Agatha Bühler, l'anteriura presidenta dal Cussegl grond.

En il segund scruttini ha lura l'actual schef dal stab directiv Martin Bühler fatg dapli vuschs che Urs Marti, numnadamain 73 vuschs da tut en tut 137. La presidenta da la fracziun e deputada dal Cussegl grond Vera Stiffler ed il vicepresident da la PLD Maurizio Michael èn gia crudads or en l'emprim scrutini.

audio
Pertge ha Bühler persvadì?
ord Actualitad dals 07.10.2021.
laschar ir. Durada: 3 minutas 53 Secundas.

Surpraisa per blers – er per Bühler sez

Che Martin Bühler ha insumma cuntanschì il segund scruttini ha franc fatg surstar ina u l'auter. Er Martin Bühler saja stà surstà ch'i haja tanschì. Uschia ha el ditg envers RTR ch'i haja dà temps en quels ch'el haja cartì ch'i gartegia, ma er temps nua ch'el n'haja betg cartì ch'i tanschia.

Jau sun intgantà – er perquai ch'jau hai sentì d'avair il sustegn. Sco i para da bleras e blers, quai repartì en l'entir chantun.
Autur: Martin Bühler Candidat da la PLD

Uss cumenzia in temp intensiv. Far cumbat electoral saja insatge nov per el, di il manader dal stab directiv ch'è pli disà da manevrar durant temps cun bovas e pandemias.

Hug per la PPS – Peyer per la PS

La PPS veva gia annunzià il settember ch'ins giaja en la cursa cun Roman Hug. Cun ses president vul la partida populara dumagnar quai che n'è betg reussì las ultimas duas giadas cun Walter Schlegel e Heinz Brand.

La direcziun dals socialdemocrats veva proponì il zercladur da danovamain ir en il cumbat electoral cun Peter Peyer. Il minister da sanadad haja pudì persvader durant si'emprima legislatura. La nominaziun uffiziala da Peyer duai succeder il di da la partida ch'è il november.

Allianza dal center vul nominar il november u december

L'Allianza dal center ch'occuppescha il mument trais sezs en la regenza, n'ha anc betg annunzià sia strategia. A la radunanza da delegads veva il co-president Kevin Brunold ditg ch'ins vegnia a nominar las candidaturas per la regenza il november u il december.

Ils dus cussegliers guvernativs Marcus Caduff e Jon Domenic Parolini sa mettan puspè a disposiziun per in'ulteriura perioda d’uffizi. Mario Cavigelli chala suenter 12 onns en la regenza.

RTR novitads 22:00

Artitgels legids il pli savens