In automobilist dad 87 onns è il venderdi charrà a Sedun en ina gruppa d'in champ da scolars. El ha para scumbiglià il gas cun il pedal dal frain, ha communitgà la polizia chantunala lur emprimas enconuschientschas.
Ina dunna da 47 onns è morta tar l'accident, duas mattatschas da 13 onns èn blessadas grevamain. L'um ch'haja chaschunà l'accident na saja percunter betg sa blessà, hai gì num sin dumonda da l'agentura da novitads Keystone-SDA.
Tenor indicaziuns da la polizia aveva el scumbiglià curt avant las 10:00 sin ina via da quartier il gas cun il pedal dal frain. Ses auto haja lura accelerà e tschiffà la gruppa da champ da scolaras e scolars ensemen cun la dunna da 47 onns. I sa tractia d'ina persuna d'accumpagnament dal champ, sco quai che la polizia declera vinavant.
Terzas persunas sajan s'occupadas l'emprim da las duas mattas da 13 onns. Suenter sajan ellas vegnidas sguladas cun dus helicopters da la Rega en ils ospitals a Cuira ed a Lucerna. Er in mat da la gruppa saja sa blessà levamain ed vegnì tractà ambulant.
Il Care Team Grischun è stà en acziun per tgirar las ulteriuras persunas pertutgadas. Er ils pumpiers da Sursassiala èn stads al lieu. Sut la direcziun da la procura publica dal Grischun examinescha la polizia chantunala las circumstanzas exactas da l'accident.