Fin ussa è la stad sa mussada da sia meglra vart. Bell'aura ed autas temperaturas di per di. Tranteren forsa in urizi. Aura per ils purs pudess ins dir. Quels profitan lura era da la situaziun e fan fain bunamain di e notg. E savens era la dumengia. Sco ch'i para na tanscha la lunga perioda da bell'aura betg per dumagnar tut il fritg durant ils dis da lavur sut tetg. Tenor lescha èsi cun paucas excepziuns scumandà da far lavurs agriculas las dumengias. Blers purs interessescha quai dentant ina jotta. Entgins han ussa surtendì l'artg.
Segar dumengias e dis da festa – in tabu?
En las vischnancas Lumnezia e Breil han intgins purs segà durant dis da ruaus. A Breil han tschintg purs prendì il motor da segar il glindesdi da Tschuncaisma ord garascha ed en ids a segar. La vischnanca ha reagì e punì ils purs cun multas da 300 francs. Sinaquai èn ils pertutgads sa drizzads envers l'Uniun purila grischuna e dumandà per sustegn. Quella ha lura scrit ina brev a la suprastanza communala da Breil cun la supplica da desister da multas.
Avant Tschuncaisma avain nus gì ina perioda da plievgia. E suenter glindesdi Tschuncaisma eri prognosticà bell’aura per trais dis. Quels che vulevan far fain en quella perioda han stuì segar quai glindesdi.
En il cas da Breil sa tractavi dentant d'in di avant ina perioda da bell’aura, e betg per duas emnas da malaura.
Savens vegn era fatg la rinfatscha ch'ils purs na lavurian las dumengias betg pervia da l'aura – mabain perquai ch'ils manaschis sajan uschè gronds ch'els na vegnan betg a fin cun las lavurs, e ch'els stoppian er lavurar ils dis da ruaus per vegnir sut tetg cun la racolta.
Igl è la realitad ch'ils manaschis agriculs èn durant ina generaziun vegnids il dubel uschè gronds quai che pertutga la surfatscha.
La lescha per ils dis da ruaus dal chantun Grischun scumonda lavurs che fan canera ni che disturban la religiun. La suletta excepziun per l'agricultura è, sche la raccolta è periclitada da vegnir svaletada ni dad ir a la malura. L'execuziun da la lescha è surdada a las vischnancas. Quai ha per consequenza che la lescha na vegn betg exequida dapertut tuttina, e ch'i dat grondas differenzas da regiun tar regiun