La populaziun da Breil elegia ils 15 da zercladur co e cun tgi ella vul occupar la suprastanza communala. I dat duas opziuns. Ina èn ils actuals che vulan anc pender vidlonder ina perioda d'uffizi. Quai èn Clau Schlosser sco president, Roman Cathomas, Heini Hunger e Maurus Tomaschett sco suprastants.
Ils novs èn Roman Flepp che vul daventar nov president, sco era Adrian Bergamin e Pascal Spescha sco novs suprastants. Resta anc Ramon Schmed ch'aveva dà giu ses post sin la nova perioda d'uffizi. Memia pauc peda, era stada l'argumentaziun. Ussa candidescha el tuttina cun Roman Flepp ed Adrian Bergamin sco trio per dar nov schlantsch a la vischnanca.
Quel trio procura per malsegirtad avant las elecziuns. I n’è betg cler sch'els acceptan lur elecziun suenter ina eventuala elecziun. I dependia da la constellaziun. Uschia insatge n’hai avant anc mai dà. Pli baud avevi num «in um, in pled» Quest verset na para betg da valair pli. Che la populaziun ha ina elecziun per eleger tgi ch’ella vul sin tge post è da beneventar, dentant betg sut da quellas cundiziuns.
Sch’ins guarda sin ils candidats che stattan a disposiziun per la proxima elecziun pon ins constatar ch'i sa tracta tar ils «vegls» plitost dad umens cun professiuns manualas. Tar ils «novs» è la gronda part economs u umens da cifras. La populaziun sa pia eleger co la vischnanca duai vegnir manada en l’avegnir.
E gea, i dat anc ina terza varianta per ils da Breil. Els pon far ina buna maschaida tranter vegl e nov e sperar che tut ils elegids surprendian lur responsabladad ed acceptan l'elecziun per cas ch'els vegnan elegids.
Reto Pfister
Producent Surselva / GR Central