- Roman Flepp punctuescha che l'administraziun stoppia vegnir concepida pli proactiva ed i saja necessari d'optimar la communicaziun.
- Clau Schlosser na vesa nagin basegn da refurmar l'administraziun communala perquai ch'il sistem actual funcziuna bain.
- Omadus candidats mettan lur focus sin ils basegns dals burgais e da meglierar l'infrastructura locala.
Vus vulais reorganisar il sistem politic da Breil. Quel ha actualmain ina suprastanza cun departaments, il cussegl da vischnanca, radunanza communala e votaziuns a l'urna. N'è quel sistem betg bun?
Roman Flepp: Sco emprim èsi da dir che fitg blera lavur è buna e bleras chaussas en la vischnanca funcziunan bain. Nus na vulain betg metter tut sin il chau. Nus vulain optimar, modernisar u refurmar là nua ch'i fa senn. Ina dumonda è sch'il cussegl da vischnanca fa senn u sch'i faschess senn da far pli baud il pass tar la populaziun.
In auter punct è che l'administraziun communala è fixada fitg sin administrar e ch'i manca in zic la proactivitad – en il caracter d'in mainafatschenta che prenda a mauns chaussas e sustegna l'executiva pli fitg cun lavurar si chaussas per lura prender decisiuns.
Quai en chaussas che nus chapin sut refurmar il sistem politic.
Dumonda a Clau Schlosser: sto l'administraziun communala vegnir refurmada?
Clau Schlosser: Tenor mai na dovri betg quai, na. Jau sun da l'opiniun ch'i saja il meglier sche mintga suprastant sto manar ses departament e lavurar en il departament ed igl è era sa mussà en autras vischnancas, ch'ins vul per part vegnir enavos tar quest sistem.
Jau sun da l'opiniun ch'ins è il pli datiers da la chaussa sch'ins sto lavurar sez e la lavur en suprastanza dat lavur. Nus avain 45 sesidas uffizialas ad onn, plus la lavur en il departament, quai è fitg blera lavur. Ins senta lura dentant era tge che la populaziun vul, nua dovri insatge e nua ston ins adattar insatge. Ins po bain trametter in emploià, la fin stat tuttina il schef davanttiers.
Vus vulais dar a l'uffizi da bajegiar dapli resursas, professiunalisar – vul quai dir che l'uffizi na funcziuna actualmain betg?
Roman Flepp: En la vischnanca da Breil datti quella plazza pir dapi in pèr onns. Uss vegn il pensum da questa persuna augmentà, quai mussa che l'uffizi è en svilup. En autras vischnancas han duas fin trais persunas questa incumbensa. Forsa da memia, forsa avain nus memia pauc. Forsa datti cumpetenzas ch'ins sto rinforzar en l'uffizi u ir extern per quellas. Tge exact ston ins lura guardar.
Sch'ins discurra cun la populaziun aud'ins che lezza n'è betg cuntenta cun tschertas chaussas, co tschertas chaussas funcziunan. I manchia per part il pragmatissem sch'i va per spertadad, per dumondas e survegnir feedback.
I va in zic per midar la tenuta, da far pli pertschert ch'ins è qua per la populaziun, da dar maun tar dumondas e betg mo infurmar tge ch'è lubì u betg tenor lescha. Tut vegn pli e pli cumplex, la populaziun avess plaschair sch'i dess dapli sustegn e contact cun l'uffizi da bajegiar. I vegn fatg buna lavur, ins sto forsa mo dar in zic in egl sin ils detagls.
Clau Schlosser: co vesais Vus la situaziun da l'uffizi da bajegiar?
Il giavisch da far insatge auter vegn mintgamai da la populaziun, e nus avain avant quatter onns introducì l'uffizi da bajegiar, avant fascheva il suprastant tut quai. Quai è pia gia la professiunalisaziun, entras quai vegn era guardà pli exact sin las dumondas – quai n'è forsa betg quai che tuts han vulì. Nus stuain giuditgar tut medem, e sche las dumondas n'èn betg cumplettas va quai enavos a quel ch'ha tschentà la dumonda.
La planisaziun locala vegn era adina pli cumplitgada, e nus na pudain là betg far bler auter che metter en vigur quai che la Confederaziun u il chantun pretendan. Ins sto dentant bain era ponderar vi dals basegns dal burgais e betg mo dal manaschi da la vischnanca – quai duess adina esser il cas – nus vulain gea pussibilitar a tuts e tuttas quai ch'els vulan far.
Vus avais bleras ideas per il cas che vus vegnids elegids. Tge fiss l'emprima fatschenta che vus prendessas a mauns?
Roman Flepp: Ina impurtanta chaussa è d'optimar la communicaziun e far quella pli transparenta. Jau crai ch'igl è impurtant per l'acceptanza e la chapientscha da la populaziun d'infurmar activamain sur dal stan da projects, e betg per cura che las vuschs criticas vegnan.
I dat bleras persunas en vischnanca che vulan s'engaschar, u politicamain u en gruppas d'interess. Jau vi tschertgar il discurs cun quellas persunas e chattar ils dretgs chanals e las dretgas modas per pudair lavurar ensemen.
Tge faschess Clau Schlosser sco emprim suenter ina pussaivla reelecziun?
Clau Schlosser: Tgi ch'enconuscha mai, sa ch'jau stun vidlonder. Vul dir ch'i dat chaussas ch'ins vegn spert vinavant ed autras ch'ins sto metter da la vart e guardar pli tard anc ina giada. Jau na vegn betg a ma midar. Il focus è adina sin l'abitant da nossa vischnanca. Jau less metter en vigur la via ed oravant tut finir la fusiun per che la glieud possia viver ensemen. Plinavant esser in bun patrun cun bunas plazzas da lavur en vischnanca e far tut quai ch'è l'obligaziun en vischnanca. Tschels projects vegnan lura, e custan era, quels n'èn dentant betg en ils mauns da la vischnanca sco prioritad.