Ils maletgs gronds èn enconuschents en l’entira Surselva. Ils ultims dus onns era da vesair sin la fatschada principala dal hostel «AutraCaussa» a Danis-Tavanasa in grond capricorn. Quel resta dal reminent er ils proxims dus onns, uschia la possessura dal hostel Bettina Seiser. La raschun è che la fatschada principala è exponida il pli fitg a l’aura e da l’autra vart fissi stà necessari d’affittar in’ulteriura stgala movibla e quai na fiss betg stà en il budget. L’ultima raschun è quella, ch’il capricorn va bain a prà en la regiun, di la possessura che viva cun sia famiglia en il hostel e vegn da l’Austria. Ma tgi sa, forsa vegnian els en dus onns er a laschar picturar puspè la fatschada principala.
-
Bild 1 von 6. Da lunsch èn las artistas ed ils artists vegnids. Il maletg è vegnì fatg dad Adnate che vegn da l'Australia. Bildquelle: RTR.
-
Bild 2 von 6. Ina da las ovras da l'artists franzos Nyota che vegn da Marseille. Bildquelle: RTR.
-
Bild 3 von 6. L'artist Nyota vi da la lavur. Bildquelle: RTR.
-
Bild 4 von 6. Pliras ovras n'èn anc betg finidas, ma fin dumengia è alura tut pront e d'admirar per ils proxims dus onns. Bildquelle: RTR.
-
Bild 5 von 6. Il luf paradescha datiers dal Rain e na po betg vegnir contemplads vi da la chasa sezza. Bildquelle: RTR.
-
Bild 6 von 6. L'artist svizzer LPVDA ha cun ina tecnica da glimar en il lain decorà ina da las fatschadas. Quai è l'emprima ovra betg dissegnada sin l'AutraCaussa. Bildquelle: RTR.
10 artistas ed artists da l’Australia fin a l’Ollanda
La schelta da las artistas e dals artists è adina ina sfida per ils organisaturs. Per exempel vegnan tschertas artistas ed artists contactads via medias socialas. L’avantatg è ch’ins po savens gia vesair tge che quellas persunas fan, di Bettina Seiser. Ma els vegnian era contactads da differentas varts da pudair vegnir a dissegnar a Danis. Surtut la cumbinaziun da pudair giudair ina bella emna en la natira è savens in argument che tira, pertge bleras persunas arrivan or da citads grondas e giaudan la natira ed il viver ensemen. Perquai hajan els era decis da numnar il concept «Art meets Nature», declara l’inizianta dal «Streetfestival». Pertge els na possian betg indemnisar las lavurs, tuts survegnian pajà ils custs da viadi e survegnian dimora, ma dapli na possian els betg porscher. Ma ils ultims onns hajan els pudì s’etablir en la scena e quai saja ina gronda satisfacziun. Ils maletgs novs restan uss probabel dus onns vi da la fatschada, alura vegnan els puspè surmalegiads. Quai è era fatg giu uschia cun la vischnanca da Breil e sa cumprovà.