Avertura studio - «Jau viv mes siemi» – nov studio da tatuar a Trun

«En in mund, nua ch'ins po esser, tgi ch'ins vul, saja bainvulent», stat scrit sin ina da las tastgas che l'artista e tatuadra Jessica Spescha malegia e venda. Ses nov studio è in studio da tattoo e serigrafia – ella fotografescha da vulps, chamutschs e tschess e stampa quests motivs sin vestgadira e tastgas.

Avant in pèr emnas ha ella serrà ses studio a Glion ed ha midà domicil: «Jau abitesch uss a Trun, hai chattà mes nov dachasa qua. Ed jau hai pensà, sch'i dat locals averts qua, poss jau gist duvrar in da quels.»

Avant set onns ha ella cumenzà a tatuar, e curt suenter è la serigrafia vegnì vitiers. Suenter ch'ella ha emprendì durant tschintg onns tar in tatuader a Val ha ella avert ses agen studio a Glion ed uss a Trun, nua ch'ella lavura suletta e sur sasezza.

Quitads ch'ella n'ha insacura nagins clients e clientas pli a Trun, n'ha Jessica Spescha nagins. Umens e dunnas da 18 fin 70 onns vegnan regularmain tar ella. La midada davent da Glion fetschia pia plitost bain ad ella e sia lavur.

«Jau hai gia gì a Glion in studio privat, nua ch'ins sto en sasez s'annunziar per in termin – sch'insatgi vegn simplamain en, cura che jau sun vid tetovar, na poss jau betg ir davent», di ella. «Qua a Trun capita quai segir main ch'insatgi vegn senza termin.»

Ed ella saja ina da las paucas tatuadras en Surselva, agiunta ella. Jessica Spescha saja persvadida che la glieud fetschia il viadi a Trun, sch'i veglian in tattoo. Pregiudizis encunter sia lavur u ses nov studio na senta ella nagins en il vitg. Per ella saja simplamain impurtant, d'avair contact cun la glieud da Trun. Perquai fetschia ella l'entschatta d'avrigl in apero d'avertura.

Ella sa legra sin il temp suenter l'avertura, cura che la rutina turna ed ella po tatuar e fa puspè quai ch'ella fa il pli gugent.

Adattà al tema

In mussament da charezza, in statement cler ubain ina passiun: En la seria da RTR «Mes tattoo, mia istorgia» avevan tschintg persunas raquintà tge istorgia che sa chatta davos lur tetovaziun. Las 5 episodas mussan: In tattoo è dapli che mo in motiv.