Var 30 transacziuns per mais en ina filiala e mintg'onn var 8-10% pli pauc utilisaziun dals bancomats. Quai èn ils motivs principals per la serrada da las trais filialas. Il cumportiment da la clientella s'haja midà. Tranter auter era pervia da la pandemia da Corona. Uschia saja la clientella sa disada da pajar cun «twint» u cun las cartas e betg pli cun daner blut. Era la pussibiltad dal diever da e-bankig ha gì in'influenza sin la lavur al spurtegl.
I na fa betg senn, da tegnair ferm via da spurtegls che na vegnan betg duvrads.
Vinavant manegia il directur che las pretensiuns envers la banca da lur clientella s'hajan era midadas. La dumonda d'experts per spartas specificas saja pli gronda. Cun quai ch'i n'è betg pussibel d'avair en mintga regiun in expert per mintga sparta da finanzas èn quels tuts centralisads a Glion. La serrada da las filialas n'ha però betg in effect sin la cifra da persunal da la banca Raiffeisen Surselva. Per las trais filialas che vegnan serradas era ina singula persuna responsabla. Quella vegn ussa ad avair il lieu da lavur a Glion e vegn vinavant ad esser responsabla per la clientella da Sursaissa, Vella e Val S. Pieder. Quai cun tgirar els persunalmain a Glion, per telefon u era tar las persunas direct.
Las persunas en ils lieus pertutgads da las serradas han diversas opiniuns. Ils ins na vesan betg in problem e mussan era chapientscha per la serrada, auters deploreschan la decisiun, surtut ch'i na dat gnanc pli ils bancomats. Plirs interrogads han era menziunà la generaziun pli veglia che n'è betg disada da duvrar la banca digitala u da pajar cun ina moda digitala. Per quel saja la serrada da las trais filialas ina gronda perdita.