Pervi d’in sbuvaditsch è la via en la Val Sumvitg vegnida serrada per tut il traffic il glindesdi saira. Il sbuvaditsch ha lavà davent il fundament da la Via Val sin 15 fin 20 meters, communitgescha il stab da crisa da Sumvitg. Qua tras na saja la stabilitad da la via betg garantida.
Nus essan leds ch'i n'è betg vegnì donnegià persunas, animals u material – auter che la via.
Suenter examinar l'analisa dals experts ha il stab da crisa decis da laschar serrada la via per pliras emnas. Betg cler è anc co reparar la via. Peduns pon passar il tschancun d'Acla Mulin sur la punt pendenta.
Persunas che sa chattian en Val Sumvitg davent dal Bogn Tenigia anen vegnan supplitgadas da s’annunziar tar la vischnanca. Questas infurmaziuns èn vegnidas duvradas l'emprim per savair sch'i giaja bain cun tut las persunas. Tenor Patrick Schaniel, il president da la vischnanca da Sumvitg, dovrian ins dentant las datas er per bajegiar si contact cun las persunas e per pudair dar vinavant infurmaziuns.
-
Bild 1 von 7. La via è serrada. Bildquelle: Thomas Hardegger.
-
Bild 2 von 7. Bildquelle: Vischnanca Sumvitg.
-
Bild 3 von 7. Bildquelle: Thomas Hardegger.
-
Bild 4 von 7. Sut quest toc – be intgins meters dasperas – è il 2017 crappa sut la via glischnada a val. Bildquelle: Thomas Hardegger.
-
Bild 5 von 7. In helicopter depona plantas cupitgadas sin la via. Bildquelle: Thomas Hardegger.
-
Bild 6 von 7. Bildquelle: Thomas Hardegger.
-
Bild 7 von 7. Peduns pon passar il tschancun d'Acla Mulin sur la punt pendenta. Bildquelle: Thomas Hardegger.
Ils proxims pass
I n'è betg pussaivel da realisar in provisori per ch'ils vehichels bloccads possian charrar surora, di Schaniel vinavant. Betg mo la via mabain era il mir da sustegn saja instabil. La suletta pussaivladad da vegnir cun ils vehichels or dal territori isolà saja, da sgular ora els. Il stab da crisa elavura in concept per sgular ora ils vehichels bloccads. Mintga persuna pertutgada po dentant decider sezza, sch'ella vul laschar sgular ora ses vehichel.
Vitiers ha la vischnanca da Sumvitg instradà las lavurs per metter a disposiziun parcadis provisorics ad Acla Mulin. Sco la vischnanca scriva sin sia pagina d'internet, duain quels star a disposiziun als giasts sco er a las possessuras ed als possessurs da chasas da vacanzas.
Las proximas infurmaziuns prevesa la vischnanca da Sumvitg da publitgar la gievgia saira a las 22:00.
Ina via ch'ha gia pli baud fatg quitads
Avant bun 8 onns era la via stada serrada. Da lezzas uras per medemas raschuns. Quai paucs meters pli datiers dal Bogn Tenigia.
Datti bainbaud in segund tunnel?
La via en Val Sumvitg è gia ditg exponida a la natira. Uschia tranter auter era avant 45 onns – la notg sin ils 2 d'avust 1980 ha ina gronda bova sutterrà la via. Quella ha purtà il Tunnel Barschaus en la val.