La vischnanca da Breil ha celebrà la davosa stad sia piuniera da turissem Fausta Capaul. Quella dunna ch'ha gì avant 150 onns ina idea visiunara ed ha era gist sez realisà quella.
Sco davosa occurrenza per las festivitads «150 onns Fausta piuniera» han ils responsabels envidà interessentas ed interessents ad in lavuratori per crear sco la piuniera d’avant 150 onns ideas e visiuns per l'avegnir. Durant il lavuratori han las enturn 30 persunas elavurà ideas, propostas e visiuns per l'avegnir da Breil.
Las ideas e visiuns han ils participants e las participantas nudà sin maisas radundas. Quellas restan enfin la fin d'october en il curtin da la chasa Fausta Capaul. In'ulteriura maisa e restada vida. Sin quella pon abitantas ed abitants e giasts nudar ulteriuras ideas per il svilup da Breil
Bilantscha
Cun quest eveniment èn las festivitads idas a fin. Il president d’organisaziun Otmar Seiler spera che ina u l’autra idea po vegnir realisada en l'avegnir e che l'istorgia da la Fausta Capaul possia uschia cuntinuar.
Il punct culminant è il gieu en il liber stà. Là avessan nus dastgà esser pli curaschus e construir ina tribuna d’aspectaturs pli gronda. Uschia n’han bleras persunas la finala betg pudì visitar il gieu musical teatral. En tut èsi dentant sta ina stad magica per nus.
