Per las canortas en las regiuns structuralmain fermas è la revisiun da la lescha per la promoziun da la tgira d’uffants cumplementara a la famiglia ina midada en la dretga via, di la manadra da la canorta «Lumpazi» a Mustér Lia Giorgio. Uschia è surtut il ristg finanzial per las canortas betg pli uschè aut.
Fin uss survegniva mintga canorta ina pauschala per uffant ed ils geniturs pajavan tenor lur entradas differentas summas. Quai muntava en las regiuns nua che las pajas èn savens pli bassas era che las canortas avevan pli bassas entradas ed uschia in ristg finanzial, di Lisa Giorgio ch’è era en suprastanza da l’associaziun professiunala per la tgira d’uffants. Cun quest ulteriur sustegn possian las canortas quintar pli a lunga vista. Era possian tant las famiglias cun bassas entradas profitar ma era quellas cun entradas pli autas, quai portia a las canortas era ina maschaida saua d’uffants, uschia Giorgio.
Co vegn la lescha uss realisada?
La dumonda centrala era per l’associaziun professiunala saja co che la lescha vegn uss applitgada. Qua giavischassan ellas da pudair collavurar cun il chantun. Fin uss n’hajan els anc betg survegnì resposta sin la dumonda, ma qua sperian ellas fitg da pudair sa gidar, perquai che ellas sajan en la pratica quotidiana. Ma en tut sajan las midadas stadas fitg necessarias ed ellas portian in meglierament per las famiglias, per las canortas e la finala surtut per ils uffants.
