Siglir tar il cuntegn

Header

audio
Plans per la renovaziun da la chamona da Cavardiras
Or da Actualitad dals 30.03.2023. Maletg: RTR
laschar ir. Durada: 4 minutas 27 Secundas.
cuntegn

Chamona da Cavardiras Renovar ed optimar il provediment d’aua

Per ina summa da 3,5 milliuns francs vul la secziun da l’SAC Winterthur renovar la chamona, cumenzadas vegnan las lavurs il 2024 e finidas duajan ellas esser l’atun 2025.

La chamona da Cavardiras è ina da las quatter chamonas da la secziun da l’SAC Winterhur en la Surselva ed ils chantuns vischins. Uschia appartegnan era las chamonas da Punteglias, la chamona dal pass dal Lembra e la Muttsee a la secziun cun radund 3’500 commembras e commembers. Construida è ella vegnida l’onn 1928, ed en dus pass è ella vegnida engrondida. L’ultima giada il 2006 cun plazzar enturn la cuschina. Per vegnir d’augmentar il temp da manaschi che cuzza il mument rodund 10 emnas, ma era per meglierar l’infrastructura actuala vul la secziun renovar la chamona per 3,5 milliuns francs.

La mancanza d’aua è in problem

Ils ultims onns ha la mancanza d’aua en la chamona da Cavardiras dà da discutar e procurà per quitads als manaders da la chamona. Surtut la stad passada era la situaziun betg simpla, uschia ils responsabels. Cun augmentar ils tancs d’aua vegnian els a pudair surpurtar in temp da quatter emnas era senza aua, uschia Thury Senn. Ma els vegnian gia l'onn 2024 a meglierar las tschiffadas da l’aua da l’autra vart da la val en in auter project, budgetà cun radund 200’000 francs. La primavaira hajan ins mintgamai avunda aua, sch’ins vegn alura d’arcunar quella a moda ideala, alura vegni era pli agreabel sche las stads vegnan pli sitgas, uschia Senn.

Chamona duai vegnir adattada als basegns dal temp

Il mument datti en la chamona da Cavardiras duas chombras grondas, ina per 40 persunas, l’autra per 20 persunas. Uschia resulta plaz per 60 persunas. Quai vegnan ins a midar e reducir ils letgs sin sulet 49 ed era a far en tut set chombras da durmir per ils osps. Quai correspundia al temp, da porscher pli pitschnas chombras. Ma chombras da dus na vegni betg a dar en la chamona da Cavardiras. Augmentar il confort ma betg far in hotel, uschia ha l’architect Martin Hellingman accentuà.

Las lavurs cumenzan la primavaira 2024

La planisaziun d’in tal project basegna ses temp, uschia l’architect e manader da construcziun Martin Hellingman. Sulet il process da lubientschas e planisaziun basegna ses temp ed en il fratemp po la secziun ramassar ils daners. Lezs èn il mument in dals puncts anc betg sclerids, pertge il mument mancan almain anc 1,85 milliuns francs per realisar l’entir project, ha il schef da la chamona e suprastant da la secziun Winterthur Thury Senn accentuà. Uschia vegnan il 2024 fatgas las lavurs da fundament e la megliuraziun dal provediment d’aua. Il 2025 vegn alura construida la chamona annexa nova e l’atun duajan sche tut va bain las lavurs esser finidas.  

RTR actualitad 12:00

Artitgels legids il pli savens