Siglir tar il cuntegn

Header

audio
Per tadlar curt e cumpact
Or da Novitads dals 18.01.2020.
laschar ir. Durada: 01:38 minutas.
cuntegn

Cooperaziun saja periclitada Sedrun Mustér Turissem SA procura per dispita

Las pendicularas da Sedrun-Andermatt e da Mustér crititgeschan la decisiun dals purtaders da Sedrun Mustér Turissem da fundar ina societad anonima senza depolitisar il cussegl d’administraziun. Uschia saja ina cooperaziun tranter las pendicularas, il Ressort Catrina e las ulteriuras interpresas turisticas periclitada, scrivan las duas pendicularas en ina communicaziun a las medias.

Decisiun nunponderada e memia svelta

Per las pendicularas na saja la decisiun da las duas vischnancas betg ponderada. Uschia vegnia la nova societad anonima controllada sulettamain da la politica e betg dals purtaders da las prestaziuns turisticas.

Il president da vischnanca da Mustér, Robert Cajacob, na lascha betg valair quai. La suprastanza da l’uniun Sedrun Mustér Turissem saja quasi identica cun il nov cussegl d’administraziun. Cunquai che l’instituziun appartegnia a las duas vischnancas saja era giustifitgà d’avair dus represchentants en il cussegl d’administraziun.

Las pendicularas possian metter in represchentant, tuttina sco l’uniun da gastronomia u da commerzi. Il 5avel sez saja per in represchentant dals proprietaris da segundas abitaziuns. Ils dus ulteriurs represchentants che fetschian cumplet la suprastanza da set, vegnian proponì da las vischnancas e na stoppian betg esser politichers, di Robert Cajacob.

Taxa turistica vegn taxada sco taglia

In punct da la critica è che la taxa turistica vegnia valitada da las vischnancas sco ina taglia e ch’ils daners vegnian uschia betg dabun als purtaders da las prestaziuns turisticas e l’infrastructura turistica. Quai na saja betg il cas, di Robert Cajacob. Ils daners da questas taxas turisticas vegnian repartids ed impundids tenor la lescha turistica.

La transparenza saja garantida e las pendicularas possian da tut temp prender invista en quellas cifras. Per las vischnancas da Mustér e Tujetsch saja dentant impurtant che Sedrun-Mustér Turissem guardia per il svilup turistic da «nossa» vart dal Pass da l'Alpsu, di il president da vischnanca da Mustér.

RTR novitads 18:00

Dapli da Surselvaavrir la Landingpage

Nach links scrollen Nach rechts scrollen