«Blera glieud na sa betg pli rir. Cun mias caricaturas vuless jau che mintgin haja insatge da sa divertir ed almain da rir in mumentin.» Quest citat da Linus Flepp è vegnì publitgà en il purtret cun el l’entschatta d'avust 2020 en La Quotidiana. La sonda passada è Linus Flepp mort suenter curta maldispostadad.
Linus Flepp è naschì ils 24 da schaner 1953 a Curaglia. Suenter avair frequentà il Seminari da scolasts a Cuira è el s'engaschà professiunalmain sco scolast primar a Mustér dal 1974 fin il 2017. A Mustér ha el er vivì cun sia famiglia.
Critic, ma tuttina popular
Sper sia professiun sco scolast primar è Linus Flepp sa deditgà intensivamain a l'art. Cun quel è el vegnì confruntà gia da giuven. «Mia mamma ha tramess mai a Turitg per emprender tudestg e là hai jau pudì guardar co Marc Chagall malegiava fanestras en il Fraumünster. Quai è stà ina gronda casualitad, ma tuttina in'interessanta scuntrada», ha Linus Flepp ditg en il purtret da l'avust 2020.
Blera glieud na sa betg pli rir. Cun mias caricaturas vuless jau che mintgin haja insatge da sa divertir ed almain da rir in mumentin.
Pli tard è el vegnì inspirà dal pictur-artist Alois Carigiet ed è sa sviluppà successivamain en ses motivs e sia tecnica. En la retrospectiva da sia lavur l'onn 2021, publitgada en furma da cudesch, è Linus Flepp vegnì cità suandantamain: «Duas olmas vivan en mes pèz: la pictura fitg critica e la populara.»
Maletgs e sculpturas
Da la pictura puramain reala è Linus Flepp sa deditgà pli e pli a l'abstract, ma adina cun in cler motiv e messadi. Las fatschas sin blers da ses maletgs discurrivan e discurran anc oz in'atgna lingua. Las ovras da Linus Flepp èn stadas da vesair en pliras exposiziuns. Sa preschentà è el regularmain a la publicitad era mintgamai a l'exposiziun d'art a Segnas.
Là en la chasa da scola aveva el ses atelier. La finala ha el ademplì a sasez in grond giavisch cun avrir l'atgna Gallaria Desertina en il center dal vitg a Mustér. Là n'ha el betg mo retschavì interessents da ses art, mabain era gì l'occasiun da manar discurs e surtut da filosofar. Quai fascheva Linus Flepp fitg gugent.
Sper bleras ovras en il spazi public ha el er illustrà ina fulla cudeschs e bain inqual frontispezi porta ina da sias ovras. Il 2021 è cumparida ina bella revista da ses operar artistic en la Chasa editura Rein. Quest cudesch dat in'excellenta survista da la gronda ed interessanta ovra da Linus Flepp.
Il caricaturist
Il spectrum da l'art da Linus Flepp è stà fitg vast. El ha malegià, furmà sculpturas, picturà fatschadas, illustrà cudeschs ed è surtut er stà caricaturist.
En sias caricaturas publitgadas mintga di en La Quotidiana ha el mussà ses grond interess per tut quai che capitava sin quest mund. El fascheva quai cun umor, malgrà che blers temas tschernids eran tut auter che umoristics.
Il sulegl ed il chaun han dà ina tempra speziala a las caricaturas. Cun quellas ha el allegrà, ma er procurà per muments da ponderaziun. Blers onns ha el er illustrà la gasetta da tschaiver La Sibla. Linus Flepp era in um popular cun in egl critic ed ina tenuta fitg ponderada. Sias ovras restan e dattan perditga er en l'avegnir dad in uman ch’è stà cun ils pes sin il plaun da la realitad – era cun ses art che porscha la chaschun da filosofar – quai ch’el fascheva cun predilecziun.