Il curs da rumantsch a Glion en la Claustra attira bleras persunas. L’onn passà era stà in nov record cun 154 participantas e participants. Quest onn èn s'annunziadas diesch persunas pli pauc. Tuttina datti in nov record cun la participaziun da 16 uffants, di il manader dal curs Conradin Klaiss. La Fundaziun Retoromana Pader Flurin Maissen ha uschia puspè mess en pe ina purschida d’emprender rumantsch per otg livels, dal entschavider fin a l’expert. E cunquai che la participaziun d’uffants è uschè auta, han ils organisaturs stuì far duas classas d’uffants. Quai saja fitg legraivel, per l’ina sa participeschian savens era ils geniturs al curs. E per l’autra mussia quai in tschert basegn d’ina instrucziun per uffants, accentuescha Conradin Klaiss.
Preparativas durant l’entir onn
Per la fundaziun datti lavur sur onn cun il curs da rumantsch. Dasperas datti era autras purschidas che vegnan organisadas, per part era novas sco istorgiettas per uffants pitschens, di Conradin Klaiss, Tuttina furmia quest curs quasi la basa da la fundaziun – surtut sch’ins prenda sulet il svilup istoric da la fundaziun. Ed il curs è ils ultims onns creschì ad in crescher, ed els han l’onn passà cuntanschì la limita da las capacitads en la Claustra a Glion. Perquai è il manader cuntent che la participaziun è tar 144 persunas, uschia hajan tuts plaz d’emprender e s’entupar.
Nua èn ils curs en l’avegnir?
En dus onns vegn il center da furmaziun Surselva a far midada en novas localitads a la staziun a Glion. Quai munta che las localitads nua ch’il curs da rumantsch ha lieu dapi il 2015, vegnan nizzegiadas sin in’autra moda.
Nus na savessan betg manar tras il curs da rumantsch sco fin qua, sche nus stuvessan bandunar la Claustra – pertge las localitads mancan en Surselva per scolar e viver per radund 150 persunas.
Co las localitads vegnan nizzegiadas n’è il mument anc betg enconuschent – e perquai saja memia baud da far ponderaziuns co vinavant, di Conradin Klaiss. Dentant è la speranza gronda da pudair restar en la Claustra dominicana a Glion.
