La vischnanca da Mustér ha ina nova cumissiun da bajegiar. Il cussegl da vischnanca ha elegì unanimamain:
- Victor Candinas, 1969, commerciant e keyholder, Mustér
- Felicia Deflorin, 1985, dessignadra da construcziun auta, Mustér
- Giuanna Desax, 1972, giurista, Mustér
- Urban Maissen, 1981, architect, Mustér
Questa nova cumissiun cumenza sia lavur il decurs dal mars quest onn per il temp restant da la perioda d'uffizi 2021 enfin 2024, scriva la vischnanca en ina communicaziun. Questa elecziun è stada necessaria perquai che la veglia cumissiun da bajegiar aveva abditgà en globo sin la fin da l'onn passà pervida differents problems.
Ultra da quai ha il cussegl da vischnanca concedì in credit da 1,8 milliuns francs per sanar la Via Cons ed in credit da 335'000 francs per il remplazzament da la canalisaziun d'aua tschuffa sco era la construcziun da la canalisaziun d'aua schubra.
Gia dapi onns sa fatschentia la vischnanca cun la sanaziun da la Via Cons e da la canalisaziun, scriva ella vinavant. Uss haja la suprastanza communala pudì suttametter al cussegl da vischnanca in project per la renovaziun da la Via Cons sco era per il remplazzament e la sanaziun da las lingias da provediment. Cun quest project saja era pussaivel da schliar las sfidas en connex cun las auas persas en il conturn da la chasa communala e da la Banca Raiffeisen. Sco la vischnanca communitgescha saja il project da la via concepì uschia ch'el resguardia singulas mesiras or dal concept per l'attractivitad dal center dal vitg.
La decisiun davart il credit da 335'000 francs vegn suttamess al referendum facultativ. Il conclus davart il credit da 1,8 milliuns francs vegn suttamess a la cuminanza da votantas e votants, probabel l'avril 2024.