La chasa da tgira Da Casa Val Lumnezia va ina nova via per augmentar la purschida e per far frunt a la mancanza da persunal da tgira. Las chombras che n'èn betg occupadas duain en l'avegnir vegnir occupadas da persunas reconvalescentas che dovran nagina u mo pauca tgira. Per quella nova purschida èsi dentant necessari d'adaptar ils process da lavur. Ier glindesdi han ils responsabels da la chasa da tgira a Vella infurmà il persunal en chaussa.
La finamira principala saja da transfurmar ina da las trais partiziuns da tgira actualas en ina nova partiziun d'abitar cun ina bassa intensitad da tgira, di Ursulina Cadruvi, la manadra dal Da Casa Val Lumnezia. «Da nov offrin nus chombras a giasts ch'èn reconvalescents, a persunas ch'èn stadas en l'ospital u era a senioras e seniors che na dovran nagina u mo pauca tgira.»
Il basegn per quella purschida existia tant en Surselva sco era ordaifer la vallada, di ella. «La nova purschida pudain nus cuvrir cun forzas da lavur internas da nossa gastronomia, hotellaria e da l'activaziun. Quellas collavuraturas e quels collavuraturs han repetidamain mussà grond interess da surpigliar lavurs che stattan en lur cumpetenza en la nova purschida dal Da Casa.»
Duas partiziuns da tgira
La nova organisaziun dal Da Casa Val Lumnezia pretenda ina midada da la structura, di la manadra da l'instituziun. «Fin ussa avevan nus singulas chombras vidas sin tut las auzadas da nossa chasa. Da nov vegnan las chombras vidas ad esser concentradas sin in'auzada. Dasperas avain nus anc duas auzadas cun letgs da tgira», di Ursulina Cadruvi.
Da nov vegnan las chombras vidas ad esser concentradas sin in'auzada.
Ella menziuna ch'i vegnia a dar duas squadras per las cussadentas ed ils cussadents da tgira. Quellas squadras sustegnian plinavant il team da la gastronomia e da l'activaziun cun las paucas lavurs en la partiziun da reconvalescenza.
«Nus prendain gist era la chaschun d'optimar ils pensums da lavur dals dus novs teams. Nus vulain correspunder al giavisch da far servetschs pli attractivs per tuttas e tuts. Concret vul quai dir che nus vulain satisfar ad in ferm giavisch da noss persunal da dismetter ils servetschs en duas parts dal di.»
Quai muntassia era che il Da Casa sco lieu da lavur daventass pli attractiv per persunas en la tgira.
Las forzas spezialisadas mancan
Sco per autras instituziuns da tgira saja i era per il Da Casa Val Lumnezia ina gronda sfida da recrutar persunal da tgira, scriva l'instituziun en sia communicaziun da medias. Malgrà las stentas intensivas dals davos onns na saja i betg stà pussaivel d'occupar permanentamain las plazzas necessarias per la capacitad cumplaina da 58 letgs da tgira.
Cun la nova structura planisada han ils responsabels dal Da Casa Val Lumnezia la finamira da pudair occupar ils letgs per 93 % l'onn 2026. La manadra da l'instituziun, Ursulina Cadruvi è persvadida che las midadas da structura portan era ina nova dinamica a las collavuraturas ed als collavuraturs: «Nus avain in fitg bun team che lavura propi cun cor. Per mai ha il bun clima da lavur che regia ussa gronda prioritad. Mo uschia èsi pussaivel da porscher l'optimal a nossas cussadentas e noss cussadents che han gea propi merità d'avair bel e bun tar nus.»
In pass impurtant
Las midadas da structura vegnan realisadas a partir da l'atun 2025 cun ina saira d'infurmaziun per il persunal che ha gì lieu ier glindesdi saira. En connex cun la situaziun finanziala dal Da Casa Val Lumnezia na datti midadas bufatgas il mument, di Ursulina Cadruvi. «Cun occupar ils letgs vids cun giasts en reconvalescenza e da vacanzas avain nus entradas era da quels letgs. Pia po i mo vegnir meglier.»
En la communicaziun da medias che il Da Casa Val Lumnezia ha tramess ier glindesdi stat i scrit che l'instituziun quinta da far in pass strategic che dettia la chaschun a l'instituziun da sa posiziunar meglier sin la fiera en l'avegnir. Fin la primavaira 2026 duai la nova purschida esser introducida dal tuttafatg. Il Da Casa Val Lumnezia è l'emprima chasa da tgira che realisescha ina cumbinaziun da partiziuns da tgira e d'ina partiziun da reconvalescenza.
