Dapi l'onn 2016 organiseschan Maria Cadruvi ed Andreas Joos cun sustegn da trais ulteriuras persunas inscunters publics che han in connex cun la populaziun ed il vitg da Ruschein.
A l'entschatta da l'inscunter che sa numna «Da cuminanza a Ruschein – la saira dals trais» è stada ina retschertga da l'onn 2016.
Nus avain vulì sentir da la populaziun, sch'il basegn per ina tala occurrenza è avant maun.
Els han gì l'idea d'organisar a Ruschein regularmain «inscunters che portan infurmaziun, divertiment, reflexiun e cumpagnia en in spiert amicabel». Uschia circumscriva els sezs sin la pagina «Da cuminanza» l'intent dals inscunters organisads en media fin sis giadas per onn mintgamai il terz di dal mais. «Nus avain mess ina limita da 20 respostas positivas sin nossa retschertga per metter en pe ils inscunters.» Andreas Joos conceda dentant ch'els hajan retschavì mo 18 respostas positivas. «Uschia che nus essan sa decidids da laschar ruassar la chaussa», sco quai che Maria Cadruvi declara.
Reponderà la decisiun
Igl è ina decisiun ch'ils conjugals Maria Cadruvi ed Andreas Joos che vivan dapi l'onn 2009 a Ruschein han dentant reponderà. Al emprim inscunter han els envidà ils 3 d'avrigl 2016 en chasa da scola a Ruschein.
Nus avain tematisà l'aura, insatge che fatschenta in e scadin.
A quella emprima occurrenza èn 40 persunas sa participadas.
Per l'inscunter dals 3 da november 2025 èn Andreas Joos e Maria Cadruvi sa servids da l'archiv da RTR. Empermessa è ina collascha da temps passads en tun e maletg che pertutgan persunas e fatgs da Ruschein. Igl è exact la 50avla ediziun da cuminanza da Ruschein e l'ultima.
Ina fin da plaschair e success.
Pertge calar cun insatge che fa plaschair e che ha success? «In pau ha quai segir era da far cun la vegliadetgna», manegia Andreas Joos che cumplenescha proximamain ses 80avel onn da naschientscha. Mintgamai ina emna sto mintgin dad els impunder per la saira da cuminanza. Ed els vegnan sustegnids da Carin Blumenthal, Mengia Menzli e Norbert Coray.
-
Bild 1 von 2. La 50avla ediziun da cuminanza da Ruschein. Bildquelle: RTR.
-
Bild 2 von 2. Bildquelle: RTR.
Inscunters bain documentads
Ils 50 inscunters da cuminanza a Ruschein èn bain documentads sin l'atgna pagina d'internet.
Per regla avain nus discurrì rumantsch, sco ch'i tutga en in vitg rumantsch.
Quai di Andreas Joos ch'è creschì si a Cuira en in ambient tudestg.
«Nus avain dentant discurrì tudestg, sche noss giasts n'han betg chapì rumantsch.», di Maria Cadruvi. Ella vesa ils inscunters era in pau sco in lieu nua che persunas d'ordaifer che han emprendì rumantsch u che èn vidlonder d'emprender rumantsch, han gì la pussaivladad da scolar l'ureglia.
«Da cuminanza a Ruschein» ha era dà la vusch a persunas che han prendì da nov domicil a Ruschein u a giasts da vacanzas. A pled èn era quatter giuvenils da Ruschein vegnids che han palesà ils 3 da november 2023 lur experientschas ch'els han fatg sis onns suenter ch'els han bandunà la scola.
Nus avain dentant er organisà uschenumnads inscunters mi-sa-pa che stat per ‹mintgin sa participescha›. Quels n'èn forsa betg stads uschè visitads sco per exempel occurrenzas cun in u plirs giasts.
Per Maria Cadruvi ed Andreas Joos èn quels inscunters dentant betg stads main impressiunants, intims e per part era fitg divertents. Per exempel quel dals 3 da matg 2024 nua che las experientschas persunalas cun l'emprim auto èn vegnidas sin maisa.
Mo in giast è stà envidà duas giadas. Duri Coray che ha raquintà ils 3 d'october 2019 davart sias experientschas sco gardist a Roma e la segunda giada ils 3 d'avrigl 2022 cur che ils pumpiers èn vegnids a pled. En tut han Andreas Joos e Maria Cadruvi envidà 90 giasts, 52 umens e 38 dunnas. Tschertgà successuras u successurs che fussen pronts da cuntinuar n'han els betg. Forsa dat quai insatgi auter che vul vinavant s'engaschar en ina furma u l'autra per la cuminanza da Ruschein.