Glindesdi: In pass suenter l'auter
Start glindesdi a bun'ura en il studio dad RTR a Cuira. Temp per survegnir la survista, far las emprimas retschertgas davart Rueun. Nus avain fufragnà en noss archivs, tschertgà temas e lantschà l'entira acziun «Tes Vitg – Tia istorgia». Durant l'emprima emissiun avain nus preschentà il vitg da Rueun ed era survegnì interessants inputs da Vus. Grazia fitg!
Mardi: Sfugatà tras ils archivs
In segund di en il studio a Cuira. Cler – las bovas èn in tema ch'ha laschà enavos fastitgs tar ils da Rueun. Bleras giadas udin nus anc durant quests dis ch'ils abitants tschantschan dal temp avant e suenter la bova. Nus avain laschà reviver questa catastrofa da natira cun suns e tuns ord l'archiv.
E lura hai anc gì num pachetar. La rulotta da RTR è vegnida emplenida cun tut la tecnica necessaria per pudair rapportar per Vus da Rueun. Anc ina giada durmir e lu cumenza l'aventura. Tge e tgi spetga nus?
Mesemna: Hallo Rueun!
Finalmain, nus essan qua! Arrivads a Rueun avain nus natiralmain emprim stuì far ina tura atras la vischnanca. E quai cun il dretg guid. Michael Cavigelli ha accumpagnà durant l'emissiun atras il vitg. El ha pudì raquintar ina massa istorgias.
Tranter auter ha el era tradì a nus ch'i deva a Rueun ina giada in runal dad ir cun skis. E pront, l'auditura Rosmarie Brenn ha chattà tar ella a chasa ina fotografia da quest temp ed ha purtà quella tar nossa rulotta.
E lu avain era nus prendì la chaschun avant che turnar a chasa ed avain fatg ina tura atras il vitg.
Gievgia: Ils da Rueun vulan anc dar vita al vitg
Nov di, novas istorgias. Era sche na betg tut grategia adina. Davart la chasa alva grategia quai a nus mo da chattar ora pauc. Dentant datti adina puspè novas istorgias che sa dattan ord ils discurs cun ils da Rueun. Plansieu enconuschain nus tschertas fatschas dal vitg. Adina puspè sa ferman persunas avant nossa rulotta e nus vegnin en contact. Qua intginas fatschas dal vitg da Rueun.
E lura giain nus a guardar nua che la giuventegna s'entaupa insumma. La US Rueun è ina da las uniuns che mussa anc co ils giuvens da Rueun sa tegnan ensemen. Joris Tomaschett mussà a nus lur localitads.
Venderdi: Tut ha ina fin, dentant emprim anc in café
«Ussa main nus a baiver café!» Avain nus tertgà ed essan ì sin visetta tar ina fatscha ch'è vegnida enconuschenta a nus ils davos dis. Savens avain nus discurrì cun Rosmarie Brenn ed il pli tard cu ella ha purtà a nus la fotografia dal runal da skis era cler – tar ella datti anc dapli da raquintar.
Cun il venderdi suentermezdi va l'emna a Rueun lura planet a la fin.
Facit
Suenter in emna va noss'aventura Rueun a fin. Nus avain gì blers interessants discurs, emprendì d'enconuscher inqual ed inquala da Rueun ed emprendì bler davart il vitg sin la terrassa amez la Surselva.
