Dapi ils onns 80 vegnan las tradiziuns dal tschaiver a Mustér tgiradas da l'Uniun da tschaiver. In punct culminant sper il di da tschaiver è la «Dertgira nauscha». Ina saira nua ch'i vegn a moda umoristica – mainsvart cun ina piztgada – guardà enavos sin l'onn e quai ch'è capità en la regiun. A la fin da la «Dertgira nauscha» vegn insatgi u insatge pendì simbolicamain vid la furtga.
Venderdi tschaiver, ils 13 da favrer 2026 ...
... èsi puspè uschè lunsch. Ils derschaders s'entaupan danovamain sin il plaz scola a Mustér per tegnair lur dretgira usitada. Sin rtr.ch e Play RTR pos er Ti esser live da la partida.
Gia dapi blers onns cumbatta l'uniun cun mancanza da commembers. Perquai hai gia dà sur ils onns intginas midadas. Ins ha per exempel spustà la «Dertgira nauscha» dal glindesdi sin venderdi e dà giu l'organisaziun da la saira da tschaiver a las musicas da tschaiver.
La media da vegliadetgna dals commembers è circa 40 plus. Ils blers da nus han gia fatg bleras giadas il tschaiver e n'han a lunga vista betg pli il plaschair da trair adina enavant il criec.
Tenor il president mancan surtut persunas pli giuvnas che vegnan suenter. Latiers dovria era persunas che han plaschair da scriver. La «Dertgira nauscha» e la gasetta da tschaiver «La Sibla» dettian blera lavur ed actualmain è quella lavur be repartida sin paucs chaus.
I duvrass da quels che scrivessan e vegnissan cun ideas e vessan plaschair da formular legher las chaussas. Ins sto dentant era avair il plaschair da star avant las persunas e preschentar.
L'uniun da tschaiver vul mantegnair vinavant ils usits, era sch'i n'è betg simpel. Intginas persunas che vegnissan en dumonda per questas lavurs ha l'uniun gia en mira. Ma tuttina resta il futur da l'uniun e dals usits senza nov schlantsch intschert.
In usit cun lunga tradiziun
La «Dertgira nauscha» vegniva gia fatga avant il 1780. Quant ditg gia n'è betg cler. Lura è l'usit tschessà ed i n'ha passa 200 onns betg pli dà la «Dretgira nauscha». L'uniun da tschaiver ha puspe laschà reviver l'usit il 1987.
Il favrer 1979 è l'emprim slalom internaziunal da la FIS «Péz Ault» stà a Caischavedra. A chaschun da quest event ha l'uniun da cura organisà ina festa sut il motto: «Tschaiver-Fastnacht». Per cuntinuar cun il tschaiver è in comité sa furmà per organisar proximas festas da tschaiver. L'uniun da tschaiver è lura vegnida fundada il 1984. Ina gasetta da tschaiver devi era gia pli baud, dapi il 1996 edescha l'uniun da tschaiver puspe la Sibla.
