Encunter il project avevi dà recurs pervia da las distanzas al guaud. Ils recurrents han gì success e la Dretgira superiura dal Grischun ha abolì il conclus da reveder il plan da zonas e cunfins da guaud.
Uschia na saja betg pussaivel da construir in hotel funcziunal e rentabel, han ditg ils investurs. L'interpresa vuleva investir 40 enfin 45 milliuns francs en in hotel cun dus bajetgs e 400 letgs.
Vischnanca burgaisa è trumpada
Ils investurs sajan stads fitg cooperativs, di il president da la vischnanca burgaisa da Laax, Vitus Dermont. Els hajan ditg tegnì la dira ed era gia ina giada redimensiunà il project. Ussa sajan els dentant vegnids tar la conclusiun ch’i saja sut quellas circumstanzas betg pli pussaivel da bajegiar in hotel che funcziunia economicamain.
La vischnanca burgaisa da Laax haja investì ina massa lavur en quest project. La decisiun da la Dretgira superiura e la retratga da l’investur muntia per la vischnanca burgaisa ch’els hajan lavurà tschintg onns per nagut.
In plan B concret n’avain nus anc betg – ma nus vegnin a sa metter immediatamain vi da la lavur.
La parcella stoppia vegnir surbajegiada fin l’onn 2031, uschiglio vegn ella enzonada, di Vitus Dermont. Ussa muntia questa decisiun ch’ins stoppia puspè cumenzar tar nulla. Els veglian far insatge sin quella parcella ed i dettia adina pussaivladads. Ma la trumpada saja zunt gronda.
Preistorgia: ils burgais da Laax concedì il dretg da construcziun
Ils burgais da Laax han concedì l'atun 2021 en il dretg da construcziun a l'interpresa Fortimo SA, il dretg da construcziun per 99 onns. Planisads eran dus bajetgs cun 93 chombras d'hotel (211 letgs) e cun 40 abitaziuns (134 letgs).
-
Bild 1 von 2. Visualisaziun dal cumplex a Murschetg Laax. Bildquelle: Vischnanca burgaisa Laax.
-
Bild 2 von 2. Bildquelle: Vischnanca burgaisa Laax.
Plinavant era l'idea da realisar in'ustaria publica cun parcadis publics. Investir vul l'interpresa ina summa da tranter 40 e 45 milliuns francs.