La vischnanca da Breil ha communitgà la dumengia d'elecziun ch'ils termins e las cumpetenzas d'avrir las brevs da votaziun na sajan betg vegnids resguardads. Concret munta quai, sco pliras funtaunas conferman ad RTR: Il chanzlist communal haja avert persuls brevs da votaziun avant il termin lubì. Cunquai haja el cuntrafatg a la Lescha davart ils dretgs politics dal Chantun Grischun. Uschia las renfatschas. I vala la presumziun d'innocenza.
Il manader da l’Uffizi da vischnancas, Thomas Kollegger, conferma il recurs che la cumissiun da quint e gestiun da la vischnanca da Breil ha inoltrà pervi da resalvas formalas en connex cun dumbrar vuschs. Ed el agiunta: Pli stgars ch’il resultat dad ina elecziun saja, pli probabel ch’ina dretgira constatescha ina tscherta influenza. Ils resultats da Breil mussan ch’il nov-elegì president ha fatg 107 vuschs dapli ch’il president en uffizi.
Ins po dir pli stgars che las elecziuns èn e pli probabel ch'ina dretgira constatescha ina tscherta influenza da questa irregularitad.
Tenor Thomas Kollegger vegnia la Dertgira chantunala ad intercurir las irregularitads tant pli spert. Da quellas irregularitads sajan raras en il Grischun, ins possia uschiglio dar in bun attestat a las vischnancas grischunas. Cunquai che la Dertgira chantunala decida en tals cas svelt, saja da quintar cun ina decisiun en ils proxims mais, concluda Thomas Kollegger.
