La populaziun da la vischnanca da Breil ha decis ina gronda roschada e cun quai per il nov schlantsch che vegn empermess dal president novelegì Roman Flepp e ses dus cun-cumbattants Ramon Schmed ed Adrian Bergamin. Medemamain ha la populaziun decis ina autra repartiziun dals mandats sin las fracziuns.
Ina terrada hai dà per dus dals quatter cussegliers actuals. Benedetg Cathomas e Maurus Tomaschett han fatg 400 e dapli vuschs pli pauc ch'ils cussegliers ch'èn vegnids elegids e n'han uschia gì nagina schanza sin ina reelecziun.
RTR: Maurus Tomaschett, Vus avais fatg be 177 vuschs tar l'elecziun sco suprastant da la vischnanca da Breil e n'essas betg vegnids reelegids. Co giuditgais Vus quest resultat?
Maurus Tomaschett: Il resultat pren jau sco bun democrat per enconuschientscha. Jau acceptel natiralmain quest resultat. Impurtant è da vesair co, u vesair il meccano da quest resultat, e lez è plausibel per mai. Uschia pos jau viver tip top cun quest resultat. Il mund lez rolla vinavant ed jau hai dapli temp liber, i dat er aspects positivs dad ina betg-reelecziun.
Vus discurris dal meccano, pudais Vus pia dar ina curta analisa da tge ch'è capità?
Ma jau pos m'imaginar uschia, quai n'è gea era betg insatge schlet, mabain i tschantscha per noss sistem cun nossas fracziuns. La vischnanca da Breil è multifara cun tschintg fracziuns e là chapesch jau schon la populaziun. Sche la populaziun vesa che nus avain en mintga fracziun in candidat sche è quai natiralmain ina gronda plivalur per nossa vischnanca. Jau hai cumplaina chapientscha che la populaziun di: Sche nus avain candidats da las fracziuns lura stain nus davos quels. Perquai quels pon purtar en l'executiva lur basegns da las fracziuns. Quai è quai ch'jau manegel cun il meccano davos il sistem. Per mai pon ins declerar quai ed jau mon da quai anora che quai è il motiv principal per quella midada en suprastanza communala.
Vus essas sco suprastant responsabel per l'uffizi da baghegiar. Quel è stà in pau en la critica. Pudess quai esser ina raschun per la terrada?
Cun manar quest departament na survegn ins mai fluras. Jau n'hai survegnì betg ina anc. Jau hai plitost survegnì autras chaussas e plitost spinas da manar quest departament. Fatg è, in departament da beghegiar è sutamess ad in fitg grond regulativ. Quest regulativ vegn da surengiu e la vischnanca ha atgnamain fitg pauc spazi dad interpretar leschas, dad interpretar zonas da planisaziun ed era zonas da baghegiar. Perquai ston ins il bia esser ualti restrictiv cun la lescha da baghegiar e magari han ins da dar la resposta che nè betg uschè populara al vis a vis cur ch'el tschertga ina excepziun. Il davos stos jau era dir, nus essan in stadi da dretg ed en in stadi da dretg ha l'uffizi da baghegiar sco era il mainadepartament da sa tegnair vi dals regulativs, pia las leschas e las ordinaziuns.
Sche Vus dais uss in sguard enavos, tge avessas pudì far meglier?
Meglier pon ins adina far. Quai che n'è betg reussì a la suprastanza communala veglia, quella ch'è anc actuala, è da communitgar. Quai è stà in fitg, fitg flaivel punct. Perquai che, jau less schon dir, nus n'avain betg fatg nagut. La supprastanza communala è stada fitg huslia, aber la supprastanza communala ha era gì da sa dar giu cun temas che n'èn betg uschè populars e temas ch'ins sa forsa era communitgar in zic pli pauc.
In da quels è per exempel la planisaziun totala, quest RPG1 ch'ins è vi da metter enturn. E l'autra chaussa è ch'ils projects turistics han muort quai pittì in zic. Jau les dentant era dir qua cleramain, ins n'ha betg fatg nagut. Las pendicularas han obtegnì in auzament dal chapital d'aczias da passa in milliun da la vischnanca. [...] La vischnanca è vi d'in project, qua è il cussegl da vischnanca vegnì infurmà la davosa giada, ch'ins vul metter en valur il lai da Breil. Il parlament sa dat actualmain per exempel giu cun in post da campadi dal TCS ch'ins vul far, ma i n'è betg vegnì communitgà correct. Ma quai na pos jau betg prender sin mai, quai n'è betg la lavur d'in cusseglier communal, quai è la lavur da l'administraziun.
Co vai vinavant per Vus en la politica? Vus essas deputà per il cirquit electoral da Breil.
Gea questa dumonda è giustifitgada, quella hai jau era fatg ier ensemen cun mia dunna, cun mia famiglia, suenter quest resultat ch'jau hai pia prendì per enconuschientscha. Jau sun da mastergn turisticher, turistica n'è nagut auter che servir e prestar a l'osp, e l'osp n'è en quest senn betg l'osp da vacanzas mabain la populaziun. Igl è uschia, jau hai fatg quai gugent enfin ussa. Quella dumonda co ch'i va vinavant stos jau ma dumondar ensemen cun mia famiglia, ensemen cun mia dunna e quai vegn ad esser segir part dal proxim mais ch'ins sto qua far tschertas ponderaziuns.