A las elecziuns dal president communal a Breil fa Roman Flepp la cursa. El survegn 443 vuschs, il president actual Clau Schlosser vegn sin 336 vuschs e n'è uschia betg reelegì. Roman Flepp entra uschia il prim da schaner 2026 en uffizi.
L'anteriur rapper da las Liricas Analas Roman Flepp vul purtar nov schlantsch en la suprastanza. Quai betg sulet, mabain ensemen cun Ramon Schmed (vegl) ed Adrian Bergamin. La suprastanza vegn cumplettada cun Heini Hunger (vegl) e cun Pascal Spescha che entra da nov en suprastanza
Igl è in di cun la perspectiva: Guardar enavant.
Sco Roman Flepp di a RTR, è el surstà quant cler ch'il resultat è. En il medem mument fa quai era grond plaschair. El haja grond plaschair e saja motivà da s'engaschar per la populaziun. Bun saja era che omaduas varts dal culm èn represchentadas uss en il cussegl. «Uss èsi impurtant d'emprender d'enconuscher la glieud che lavura per la vischnanca», uschia Flepp. Ma era da sa preschentar a la glieud e da tadlar tiers als collavuraturs e las collavuraturas.
Gronda midada en suprastanza
La populaziun da la vischnanca da Breil ha decis ina gronda roschada e cun quai per il nov schlantsch che vegn empermess dal president novelegì Roman Flepp e ses dus cun-cumbattants Ramon Schmed ed Adrian Bergamin. Medemamain ha la populaziun decis ina autra repartiziun dals mandats sin las fracziuns.
Aveva Breil fin ussa trais commembers en suprastanza e Dardin e Vuorz mintgamai in, ha Breil a partir dal 01.01.2026 mo pli dus commembers ed Andiast, Vuorz e Danis mintgamai in. Cun quai vegn la dominanza da la fracziun da Breil en la suprastanza terminada.
Ina terrada hai dà per dus dals quatter cussegliers actuals. Benedetg Cathomas e Maurus Tomaschett han fatg 400 e dapli vuschs pli pauc ch'ils cussegliers ch'èn vegnids elegids e n'han uschia gì nagina schanza sin ina reelecziun.
Ultra da quai han anc gì lieu elecziuns per la cumissiun da quint e gestiun, il cussegl da vischnanca ed ils suppleants dal cussegl da vischnanca.
Resalvas davart l'elecziun
En connex cun las elecziuns dettia resalvas formalas en connex cun dumbrar vuschs, scriva la vischnanca. Ils termins e las cumpetenzas dad avrir las brevs da votaziun na sajan betg vegnidas tegnidas en sco pretendì da la lescha ed ordinaziun.
La cumissiun da quint e gestiun vegnia ad inoltrar in recurs concernent il dretg da votar per sclerir las resalvas. La suprastanza en uffizi sustegnia e collavureschia en connex cun quest recurs. Ni il president actual ni il president elegì n'han prendì posiziun en chaussa envers RTR.