Ils resultats da las elecziuns da Breil èn valaivels. Roman Flepp è cun quai uffizialmain elegì sco president communal. La vischnanca ha retratg il recurs concernent il dretg da votar ch'igl ha dà la dumengia d'elecziun avant var duas emnas. Quai rapporta la Fundaziun Medias Rumantschas (FMR).
La decisiun a l'urna saja crudada cleramain e na saja betg dispitaivla. Suenter ina «consultaziun giuridica» haja la vischnanca lura decidì – en enclegientscha cun tut las partidas involvidas – da retrair il recurs. Plinavant veglia la vischnanca evitar ch'uschè in cas capitia puspè. Ils eveniments en il biro da votar vegnan examinads. Ils resultats da quell'examinaziun vegnian preschentads cura ch'els èn pronts.
Tge è capità?
La vischnanca da Breil ha communitgà la dumengia d'elecziun ch'ils termins e las cumpetenzas d'avrir las brevs da votaziun na sajan betg vegnids resguardads. Concret munta quai, sco pliras funtaunas conferman ad RTR: Il chanzlist communal haja avert persuls brevs da votaziun avant il termin lubì. Cunquai haja el cuntrafatg a la Lescha davart ils dretgs politics dal Chantun Grischun. Uschia las renfatschas.
Il manader da l’Uffizi da vischnancas, Thomas Kollegger, ha confermà il recurs che la cumissiun da quint e gestiun da la vischnanca da Breil aveva inoltrà pervi da resalvas formalas en connex cun dumbrar vuschs. Ed el aveva agiuntà: Pli stgars ch’il resultat dad ina elecziun saja, pli probabel ch’ina dretgira constatescha ina tscherta influenza. Ils resultats da Breil mussan ch’il nov-elegì president ha fatg 107 vuschs dapli ch’il president en uffizi.
Ins po dir pli stgars che las elecziuns èn e pli probabel ch'ina dretgira constatescha ina tscherta influenza da questa irregularitad.
Da quellas irregularitads sajan raras en il Grischun, ins possia uschiglio dar in bun attestat a las vischnancas grischunas. Ina decisiun da la Dretgira chantunala fiss vegnida entaifer intgins mais, uschia Thomas Kollegger. Cun quai che la vischnanca ha retratg il recurs, n'è quella decisiun dentant betg necessaria.
Sco che Thomas Kollegger ha ditg envers la FMR, saja quai il dretg da la vischnanca da retrair in recurs. Ils motivs n'enconuschia el betg. Impurtant saja per el che la vischnanca e ses gremis sajan vegnids sensibilisads per il dretg da votar e sias reglas.
