Nagina tensiun tar l'emprim scrutini...
Las elecziuns communalas dals 18 da matg a Glion n'han betg bittà grondas undas. Ni per il presidi communal ni per la suprastanza hai dà in cumbat electoral. La tensiun era tar nulla.
Tuttina tar il parlament: Durant il temp d'annunzia uffizial n'hai gnanc dà avunda candidats e candidatas per occupar tut ils 25 sezs. Pir curt avant las elecziuns eran intginas persunas anc s'annunziadas. La fin finala han 20 persunas dumagnà l'elecziun en il parlament e 6 n'han gì nagin success.
En il segund scrutini han candidà 12 persunas per ils 5 sez libers. Elegids èn vegnids Fabiana Theus Simoni (PLD), Rafael Bisquolm (senza partida), Stefan Arpagaus (senza partida), Remo Camenisch (Center) e Roman Keller (Verda).
...però cun gronda midada en proxima legislatura
Il parlament da Glion vegn a sa midar radicalmain sin la proxima perioda d’uffizi. Uschia vegnan 14 dals 25 sezs occupads cun novas persunas. Il parlament na sa regiuvinescha però betg mo dal dumber ennà, mabain era en la vegliadetgna.
Ils parlamentaris e las parlamentarias gia elegidas han ina vegliadetgna mediana da 39 tar lur emprim di il 2026. Cumpareglià cun il parlament ch'ha cumenzà il 2022 ch'aveva ina vegliadetgna mediana da 47 onns. E cunquai che la vegliadetgna mediana dals candidats e las candidatas per il segund scrutini è en media tar radund 43 onns, vegn il parlament en mintga cas «pli giuven».
Tar las partidas han il Liberaldemocrats e las Liberaldemocratas en mintga cass gudagnà bler. Il Center ha pers in sez en il parlament. E danov è in sez socialdemocratic, in auter verd en il parlament. Tar la dumonda dal gender vegnan las dunnas a perder almain 4 sez.