La revisiun totala da la constituziun da la vischnanca Ilanz/Glion è ina dira nusch. Quai vesan ins vid il fatg quant ditg che quel process va gia. Il 2023 ha la populaziun acceptà in'iniziativa che vul midar la structura. Ina varianta è in sistem cun radunanza communala (enstagl dal parlament), in'autra è in parlament pli pitschen.
La cumissiun preparatorica preferiss in parlament pli pitschen cun 17 enstagl 25 commembers, e betg ina radunanza communala. En il parlament pli pitschen duessi plinavant dar trais persunas substitutas per il cas ch'in parlamentari u ina parlamentaria n'è betg preschenta.
Departaments enstagl direcziun
Er en l'executiva duai dar midaments. Sch'i va tenor la cumissiun preparatorica duai la suprastanza survegnir departaments. Uschia duessan las incumbensas en la suprastanza vegnir pli interessantas. In auter punct, uschia Claudio Quinter da la cumissiun preparatorica:
Nus vulain introducir departaments per dar a la suprastanza dapli cumpetenzas.
Persuenter na dessi nagina direcziun communala pli.
Autras midadas èn prevesidas en l'administraziun. Uschia duai dar ina cumissiun da bajegiar. Quella decisiun duai dentant crudar independentamain da las autras restructuraziuns ed er betg sin nivel da la constituziun. Cun far in'adattaziun da la lescha correspundenta duai quella decisiun crudar pli spert. En connex cun l'uffizi da bajegiar da Glion hai numnadamain gia pli ditg dà discussiuns, surtut pervia da process che cuzzan ditg.
L'introducziun d'ina nova cumissiun da construcziun che consista da trais persunas è prevesida d'installar uschè spert sco pussaivel.
Votaziun il 2026, en vigur il 2029
Davart las midadas en la suprastanza e sch'i duai dar in parlament u tuttina ina radunanza communala duai la populaziun da Glion decider fin il pli tard la fin da l'onn proxim. Il proxim temp – e surtut l'onn proxim – spetgan a Glion anc pliras discussiuns, occurrenzas d'infurmaziuns e preparativas per questa votaziun.
La decisiun giess lura – sche tut va tenor plan – en vigur l'entschatta 2029. Fin che las midadas èn installadas e fatgas vegni numnadamain a cuzzar anc in temp. Il 2029 pudess la populaziun da Glion lura eleger suprastanza e parlament cun il nov sistem. Il 2030 – cun la nova legislatura – giessan las midadas en acziun.
Novitads, eveniments ed istorgias localas. Tut tge che curra e passa en la Surselva chattais vus qua.