Sco la vischnanca da Glion ha scrit, vul ella accelerar las proceduras per survegnir ina lubientscha da bajegiar. Uschia duai dar meglras infurmaziuns sin la pagina d'internet. Ed il manader da l'uffizi da bajegiar duai far part da las sesidas da la direcziun. Vitiers duain tschertas decisiuns impurtantas, u che pertutgan projects gronds – vegnir communitgadas tant a scrit sco era via telefon.
Vitiers vul la suprastanza resguardar in'ulteriura simplificaziun tar ina proxima revisiun da la lescha da bajegiar. Annunzias simplas pudess lura l'uffizi da bajegiar decider, enstagl sco actualmain la direcziun.
Per part valan leschas surordinadas
Tar autras pretensiuns dals petiziunaris mettia la lescha cunfins, scriva la vischnanca da Glion. Quai per exempel per giuditgar provisoricamain in project, u per desister d'ina valitaziun estetica tar ina dumonda da bajegiar.
Plinavant prevesa la vischnanca da Glion pliras mesiras per augmentar la qualitad dals servetschs da l'uffizi da bajegiar. Uschia duain collavuraturas e collavuraturs da la vischnanca visitar ina scolaziun da communicaziun ed amiaivladad professiunala. Ed ils clients e las clientas da l'uffizi da bajegiar duain pudair dar resuns durant in tschert temp, quant cuntents ch'els u ellas èn cun la procedura per la permissiun da construcziun.
