Il suveran da Flem ha pia la schelta tranter dus candidats: In d’els è l’econom ed interprendider independent Nicola Fantini ch'ha gia candidà avant quatter onns per il post da president. Suenter che Martin Hug è la finala vegnì elegì, è Nicola Fantini daventà suprastant e schef dal departament da bajegiar da la vischnanca da Flem. Cun sia candidatura quinta el da cuntinuar sia lavur da svilup che Flem maina sut il num da «Zukunft Flims».
Jau less gugent cuntinuar ils projects che nus avain cumenzà. Surtut en ils champs d’abitar e da sport.
Ses cuntracandidat per il sez dal president è l’hotelier Christoph Schmidt. El è il possessur e manader da l’Hotel Schweizerhof a Flem ch'è gia dapi quatter generaziuns en il possess da la famiglia. Tut tenor ses motto «communabel per noss Flem» vul Christoph Schmidt in fitg bun dialog cun las differentas gruppas en mira a Flem ed en la regiun, sco er promover in turissem da qualitad ed il lieu d’abitar.
Jau vi conservar e sviluppar il spazi d’abitar e viver a Flem.
Impurtant tema en il cumbat electoral è il svilup dal turissem en la destinaziun da vacanzas. Nicola Fantini di che Flem è in lieu fitg attractiv ed el vul promover in turissem da qualitad. I duai dar differentas gruppas da clientella e betg mo glieud che giaja cun skis. Christoph Schmidt manegia che Flem haja fitg buns products. Tenor el stoppian ins valurisar l’infrastructura existenta, ils osps duain avair gugent quella. Il turissem duai sa sviluppar ordaifer ils temps da la stagiun auta nua che la destinaziun saja gia fitg populara.
Sch'ins discurra da svilup: En la davosa legislatura hajan ins pudì dar chatsch a fitg blers projects che sajan stads airi en ils davos onns, manegia Nicola Fantini che viva cun sia famiglia dapi 12 onns a Fidaz. La suprastanza communala haja fatg vinavant. Mintgatant uschè spert ch'ins n'haja betg cuntanschì tut la glieud. Il suprastant vul entrar pli fitg en il dialog cun la populaziun. Christoph Schmidt manegia ch’i saja impurtant ch’ins priorisescha las numerusas lavurs che la vischnanca ha, avant ch’ins giaja cun clera intenziun vi da la lavur.
Uschia sa bittan ils dus candidats – che n’èn tuts dus betg en ina partida – en il cumbat electoral: Nicola Fantini cun sia experientscha sco suprastant ed enconuschientscha dals numerus projects che la vischnanca da Flem ha instradà ils davos quatter onns. E Christoph Schmidt ch'è – sco hotelier e president da hotelleriesuisse Flem-Laax-Falera – al puls dal turissem e che dumonda ina tscherta zavrada en quest sectur.