Cun l'arrivada da la primavaira preschenta Glion sia exposiziun annuala da commerzi e mastergn. Ils 11 d’avrigl 2026 sa mussan passa 40 fatschentas ed expositurs da la regiun a la «Primavera» cun ina vasta purschida e cun numerusas attracziuns.
A chaschun da l'exposiziun vegn serrada la Via dal Glogn per il traffic ed uschia averta per expositurs da las fracziuns da Glion e la clientella. Là pon visitadras e visitaders flanar sper differentas staziuns ed attracziuns per famiglias ed uffants.
Igl è impurtant ch’ils giasts vegnan a Glion e vesan tge che nus purschain. Uschia visitan els forsa ina stizun ch’els na visitassan uschiglio betg. Alura vesan els forsa tge ch’i dat tut da cumprar a Glion enstagl insanua auter.
In element central da l'exposiziun è il program accumpagnant: tranter auter cun ina parada da moda, ina tavolata, preschentaziuns d'ideas da nozzas, musica live sco er preschentaziuns dals pumpiers da Glion e da la Polizia chantunala dal Grischun che dattan invistas en lur lavur.
La finamira da la «Primavera» è da render visibla la diversitad economica e sociala da la regiun e da promover il barat persunal tranter la clientella ed ils manaschis. La «Primavera» mussa Glion e conturn sco lieu viv d'economia e da scuntrada e sa drizza sapientivamain a l'entira populaziun.
