Durant sia ultima giada en la halla da la citad da Cuira hajan ins dumbrà 21'850 visitadras e visitaders, scrivan ils organisaturs en ina communicaziun.
Dals 9 fin ils 12 d'avrigl ha in vast public visità las differentas occurrenzas. Sin il program stevan tranter auter in duel da cuschinar tranter politichers e politicras grischuns, nua ch'igl è er vegnì discutà davart temas politics.
-
Bild 1 von 3. Bildquelle: higa.
-
Bild 2 von 3. Bildquelle: higa.
-
Bild 3 von 3. Bildquelle: higa.
Plinavant hai er dà ina purschida per glieud activa cun in parc da raiver sin sugas. E per l'emprima giada è la Higa er daventada in local da notg – l'anteriura cuschina da la halla da la citad è vegnida midada en in club.
La proxima giada mida l'occurrenza en la nova halla d'events Areon tar l'Obere Au.
Il 2024 è la «Higa» turnada
L'exposiziun da commerzi, industria e mastergn «Higa» datti dapi il 1957. L'idea era sco oz era da dar a la mastergnanza ina plattafurma per sa preschentar. Ma suenter la pandemia ha l'exposiziun cun il num «Grimavera» remplazzà la «Higa». La citad da Cuira, sco organisatura, ha suenter quella emprova puspè laschà organisar persunas privatas l'exposiziun da primavaira. Per l'ina n'haja la citad mai previs d'organisar a lunga vista ina tala exposiziun, per l'autra hajan ins spetgà dapli da la «Grimavera».
Suenter corona è anc vegnida annunziada in'ulteriura exposiziun, la KHUGA, ch'è sa focusada sin il mastergn local da Cuira. Quella ha gì lieu dals 18 fin 21 da matg 2023, fin uss la suletta giada. Parallel cun questa fiera hai er anc dà la fiera Imboda a Domat.