Da vesair dettia, sper var 110 expositurs ed in nov concept da messa, er activitads sco ina zipline, gokart ed in parc da divertiment «Luna-Park». La zipline saja ina tirolaisa che pussibilitescha da sgular tras la halla da la citad.
Ultra da quai duai l'exposiziun vegnir sviluppada cuntinuadamain sur ils proxims onns. Part dal nov concept saja ina passascha da mangiar cun ina pinta, ma er la localitad da party cun bands e DJs saja vegnida construida da nov e pli gronda. Ils organisaturs spetgan var 15'000 visitadras e visitaders.
Nova organisaziun
Dapi la davosa ediziun hai dà pliras midadas en l'organisaziun. Uschia èn per exempel ils dretgs da realisaziun ha la Stadthalle Chur AG vegnids transferids a la United Events AG ch’è vegnida fundada da nov.
Differents nums e messas
L'exposiziun da commerzi, industria e mastergn «Higa» datti dapi il 1975. Ma suenter la pandemia ha l'exposiziun cun il num «Grimavera» remplazzà la «Higa». La citad da Cuira, sco organisatura, ha suenter quella emprova puspè laschà organisar a persunas privatas l'exposiziun da primavaira. Per l'ina n'haja la citad mai previs d'organisar a lunga vista ina tala exposiziun, per l'autra hajan ins spetgà dapli da la «Grimavera».
Suenter corona è anc vegnida annunziada in'ulteriura exposiziun, la KHUGA, ch'è sa focusada sin il mastergn local da Cuira. Quella ha gì lieu dals 18 fin 21 da matg 2023, fin uss la suletta giada. Parallel cun questa fiera hai er anc dà la fiera Imboda a Domat.