Suenter il Na da Falera cuntinuescha il project da fusiun mo cun Laax, Schluein e Sagogn. Quai ha il manader dal project Adrian Wolf ditg ad RTR.
Opiniuns gia fatgas
2011 e 2016 ha la suprastanza communala da Falera refusà contractivas da fusiun, il november passà ha ella dentant decidì da laschar decider votantas e votants. I n'ha betg dà grondas discussiuns a la radunanza communala da venderdi saira. Sco il president da vischnanca Wendelin Casutt ha ditg ad RTR, eran las opiniuns gia fatgas.
Tema da parter Crap Sogn Gion
Arguments encunter èn stads che la vusch da Falera giess a perder cun ina fusiun, e ch’ins na veglia betg unfrir il num. In giuven ha manegià che Falera haja era anc forza visavi l'Arena Alva senza ina fusiun. Wendelin Casutt manegia che blers hajan era gì tema da stuair parter, per ex. il Crap Sogn Gion ch'è sin territori da la vischnanca da Falera.
Il vitg Falera ed il culm, il Crap Sogn Gion, quai è la perla en l'Arena Alva.
Arguments persuenter èn stads, ch’i na fiss betg bun da restar persul e ch’ins stoppia avair tut ils fatgs sin maisa avant che decider definitivamain.
Laax, rumantsch e 50%
Sco il manader dal project Adrian Wolf ha conferma ad RTR, avess la vischnanca fusiunada num Laax, il linguatg uffizial fiss rumantsch ed il pe da taglia restass tar 50% da la taglia chantunala simpla (sco quai è gia il cas tar Laax e Schluein).
L’ultim pled en chapitel han alura puspè votantas e votants da las trais vischnancas.
