Siglir tar il cuntegn

Header

audio
Fieu d'admoniziun: Acziun per animals da salesch
Or da Actualitad dals 01.10.2022.
laschar ir. Durada: 4 minutas 23 Secundas.
cuntegn

Fieus d’admoniziun Petiziun pretenda da regular immediat il triep dal Beverin

La petiziun surdada da l’Uniun purila Grischuna e da quella da la Surselva pretenda da pudair regular immediat il triep da lufs dal Beverin. Il mastgel luf dal triep dal Beverin mussia gia daditg in cumportament negativ e dettia quel era vinavant a ses pitschens. Quai saja ina situaziun era betg cumparegliabla cun auters trieps da lufs en il chantun e perquai stoppian ins era pudair en in tal cas prender mesiras spezialas, ha ditg il president da l’Uniun purila Grischuna Thomas Roffler. Dentant saja era cler ad els che la lescha vertenta e la democrazia stoppia vegnir resguardada, e perquai saja la via actuala sur il parlament federal la dretga, uschia Roffler.

Il chantun vul regular gia daditg il triep dal Beverin

Il chantun haja gia dumandà pliras giadas per ina lubientscha da sajettar betg sulet pitschens lufs dal triep dal Beverin, mabain era il mastgel, di il president da la regenza Marcus Caduff. Els sajan dentant obligads da resguardar las leschas vertentas, era tar petiziuns. Ma mintgin astgia inoltrar ina petiziun e quella vegnia el a dar vinavant a las instituziuns cumpetentas. Per Marcus Caduff èsi impurtant d’adina puspè far attents tuts sur da la problematica. Mintgatant saja el surstà quant pauc che represchentants a Berna sappian da la situaziun en il Grischun, alura saja lur obligaziun da far attent e discussiunar. Ma il meglier che possia schabegiar saja che dapli persunas sajan la finala pertutgadas, pli urgent daventia il tema, era a Berna.

Datti ina maioritad en il Cussegl naziunal per la proposta Engler?

Per Martin Candinas, cusseglier naziunal e futur president dal Cussegl naziunal, èsi cler che la clera decisiun dal Cussegl dals chantuns gidia la finala era per chattar maioritads en il Cussegl naziunal. Ins stoppia dentant adina puspè esser conscients che las relaziuns politicas sajan autras en la Chombra gronda. Tuttina vesa el ina schanza che la lescha vegn approvada e ch’in pussaivel referendum ed ina votaziun naziunala possia dar ina maioritad per la schliaziun dal Cussegl dals chantuns, che prevesa da pudair regular il luf sumegliant al sistem da regular il capricorn. Era Martin Candinas è da l'avis che dapli persunas ch’èn la finala pertutgadas da la preschientscha dal luf, cun tuttas consequenzas, e dapli persunas che vulan ins sistem simpel, nua ch’ils chantuns pon regular lufs che fan donns en muntaneras protegidas a moda simpla, e da pudair classifitgar el futur lufs betg pli sco animal.

RTR actualitad 08:00

Artitgels legids il pli savens