Siglir tar il cuntegn

Header

audio
Stretgas en la contrucziun: Mancanza da material e pretschs pli auts
Or da Actualitad dals 04.05.2021.
laschar ir. Durada: 02:26 minutas.
cuntegn

Firmas da construcziun Material ha retard e pretschs èn vegnids auzads

Gia l’entschatta da l’onn han ils problems en connex cun corona entschet. Las firmas han realisà, ch’ils pretschs per ils materials da construcziun èn vegnids auzads e ch’il material vegn furnì pli tard che previs.

Per far frunt in pau al problem dals pretschs hajan els empruvà da segirar il material ch’ins dovria adina uschia ch’ins haja quel, di Guido Friberg, in dals manaders da fatschenta da la firma da construcziun Loretz SA a Sedrun.
Ma ils pretschs pli auts na possian els betg adossar al client u la clienta, perquai ch’els sajan liads a l’offerta fatga. Ina pussaivladad saja da tschertgar auters furniturs. Quai na saja dentant betg simpel en la situaziun actuala.

Grev da planisar

Dapi il mars/avrigl hajan ils furniturs ultra da quai er fatg attent ch’els hajan problems da furnir il material. Surtut products da lain, da fier, d’isolaziun e material da bischens manchia. Pervia da quai pateschia la planisaziun, di Guido Friberg. Ins stoppia far attent ils planisaders da vegnir pli baud, per ch’ins haja peda da tschertgar ils materials.

La sedia da la firma Loretz a Sedrun
Legenda: La sedia da la firma Loretz a Sedrun RTR, Hubert Giger

Problems restan probabel anc in pèr mais

Problems sumegliants ha per ex. era la firma Valaulta Berni a Rueun. Sco il manader da fatschenta Daniel Blumenthal ha ditg ad RTR, hajan els era realisà ch’ils pretschs èn ids ad aut e che tscherts materials vegnian furnids cun retard. Omadus manaders da fatschenta dian dentant, che la lavur na manchia betg, ma quests problems vegnian probabel anc a cuzzar in pèr mais.

Betg mo in problem da singulas fatschentas

La mancanza da tscherts materials conferma er Maurus Blumenthal, il directur da l’Uniun grischuna d’artesanadi e mastergn. Quai na saja però betg in problem be dal chantun, mabain da l'entira Svizra e tar tscherts products er in problem europeic e mundial.

audio
Maurus Blumenthal davart las raschuns per las stretgas tar il material da bajegiar
03:05 min, Actualitad dals 04.05.2021.
laschar ir. Durada: 03:05 minutas.

Ils motivs sajan differents. Conflicts economics tanter pajais, dinamicas entaifer las ecnomias en divers pajais ma er trends tecnologics possian influenzar la chadaina da furniziun. Na l’ultim hajan er ils differents lockdowns effects ch'ins percorschia per part pir ussa. In sistem logistic che lavuria senza gronds deposits e sin dumonda haja insumma in pli grond ristg da vegnir en in tschert inequiliber, agiunta Maurus Blumenthal vinavant. Per pudair importar ed exportar products saja la Svizra particularmain dependenta dad in’economia globalisada.

RTR actualitad 07:00

Artitgels legids il pli savens

Scrollar a sanestra Scrollar a dretga