Las aissas che Victor Flepp ha davos sia scrinaria han anc da setgar. Uschia ch’el na po betg duvrar ellas il mument. Da laschar resgiar sez laina, quai saja ina varianta per evitar ina mancanza da material. Quai fascheva el dentant gia avant il temp da corona uschia, di Victor Flepp che lascha resgiar laina indigena en la resgia da la vischnanca da Medel. E cun la mancanza da lain actuala, haja el l'ultim temp laschà resgiar dapli che usità.
Surtut material da diever è scart
Cunzunt plattas da lain colladas sajan massiv pli charas. La producziun na saja betg stada ina optimala durant il temp da corona. Uschia hajan ils furniturs lur magasins vids u quasi vids il mument ed uschia saja quest lain era pli char. Era la gronda dumonda suenter lain en ils Stadis Unids da l’America ed en l’Asia saja in motiv, daco ch’il lain manchia per part en l’Europa. Ma il mument possia el producir, i saja simplamain d'organisar ad uras tut il material. Uschia saja pussaivel che material ch’ins spetgava gia avant intgins dis, vegnia uss pir suenter pliras emnas. Cura ch’ins haja blera lavur, saja quai propi ina sfida dad esser pront cun tut il dretg mument, di Victor Flepp.
Era en il Surses il medem maletg
Era per Enrico Uffer èsi il mument ina situaziun speziala. Uschia saja propi da spetgar ditg sin material. Ed era el senta ils pretschs pli auts per laina. Il project d’ina resgia en il Surses ch'è actualmain en lavur, saja per la situaziun actuala memia tard. Uschia na possian ins anc betg profitar da las sinergias giavischadas. Ma en futur saja segir la finamira da vegnir pli independent da l'exteriur cun laschar resgiar laina indigena. La finamira saja da resgiar fin a 30'000 meters cubics ad onn. Cun quest quantum saja segir la producziun indigena cuverta, ma i tanschia era per pliras autras scrinarias en l’entir chantun, di Enrico Uffer. Oz u damaun na possian ins dentant anc betg profitar.
