La vischnanca da Glion è en il mument amez la revisiun totala da la planisaziun. Sco tut las vischnancas ch'èn vegnidas classifitgadas sco vischnanca cun zonas da construcziun surdimensiunadas, sto ella en il proxim temp dezonar u redimensiunar parcellas da bajegiar. Il schaner passà aveva ella tramess in emprim project per in'examinaziun preliminara al chantun. Quest atun ha lez respundì cun in parairi pli u main positiv, uschia il manader planisaziun e construcziun da la vischnanca, Andreas Pfister.
Nus n'essan betg a la fin, i dat il basegn a meglierar, ma nus na stuain betg gist cumenzar tar nulla cun nossa planisaziun.
La vischnanca sto tenor il parairi dal chantun dezonar dapli terren ch'il project inoltrà prevesa. La vischnanca veglia da princip dezonar uschè pauc sco pussaivel e per quest intent tschertga ella schliaziuns sco per exempel da definir novas zonas da bajegiar en uschenumnads territoris cun potenzial da svilup, di il manader planisaziun da la vischnanca.
Ussa vegnia la vischnanca da Glion a surlavurar il project per pudair silsuenter instradar la procedura da participaziun, sche pussaivel en la segunda mesadad da l'onn 2024.
Nus quintain cun bleras dumondas che vegnan inoltradas tar la procedura da participaziun.
Sche tut giaja tenor plan, pudess il suveran da Glion decider la fin da l'onn 2025 davart la zona da planisaziun a l'urna, uschia Andreas Pfister. Il è previsibel che la vischnanca vegn a prolungar la zona da planisaziun per in'ulteriura giada.
