Bleras vischnancas en il Grischun stattan avant la medema lavur e sfida. Ina revisiun totala da la planisaziun locala. Paucas vischnancas han gia fatg questa lavur intensiva. La revisiun succeda tenor ina prognosa dal svilup da la populaziun en vischnanca.
Concret vul quai dir che sch'il svilup va a munt, dovra la vischnanca dapli zonas per pudair bajegiar, va la prognosa demografica dentant enavos, lura dovra la vischnanca pli paucas zonas da bajegiar. Uschia ston bleras vischnancas, cunzunt en Surselva, prender terren da bajegiar ord zona.
A Mustér sun quai 2 hectaras che ston vegnir zonadas ora. In auter instrument per avair ina planisaziun che correspunda la fin finala a las pretensiuns actualas da Confederaziun e chantun è da far ina mobilisaziun sin il terren da bajegiar. Quai munta ch'ins è obligà da duvrar il terren da bajegiar entaifer 2, 3 ubain 8 onns. Uschia preveda la nova planisaziun locala da Mustér da mobilisar 94 parcellas. Na vegn il terren betg surbajegià entaifer ils termins definids, po la vischnanca cumprar il terren, relaschar quel ord la zona da bajegiar ubain era incassar ina taxa.
Ina revisiun totala da la planisaziun locala e ina cumplexa materia. Dapi 5 onns è la suprastanza communala, ina cumissiun da planisaziun e la planisadra Esther Casanova vid metter en pe questa proposta che vegn la fin dals quints avant la populaziun.
Suenter ch'il parlament communal aveva betg pudì terminar en sia emprima seduta la discussiun davart quest tema, hai dà glindesdi saira anc ina radunanza supplementara. En quella han cusseglieras e cussegliers anc debattà ina giada cunzunt davart la cifra d'utilisaziun en las differentas zonas. La finala hai dà in resultat cler, il Cussegl da vischnanca ha approvà la revisiun totala da la planisaziun locala. Ussa sto anc il suveran decider en chaussa. Questa votaziun ha lieu ils 30 da november 2025 a l'urna.