Ilanz/Glion - Terz Städtlilauf a Glion cun 570 curriders e curridras

En tut sajan stadas annunziadas 570 persunas per las differentas cursas da la sonda, sco ils organisaturs communitgeschan.

Sper la cursa populara cun 250 participants e participantas haja era dà ina cursa d'uffants, ina da «walking» ed ina cursa libra per tuts, che dat la pussaivladad a persunas cun impediment da sa participar.

La saira hai anc dà ina cursa d'eliminaziun ed in concert. Ils organisaturs èn fitg cuntents cun l'entir di.

Resultats Datasport

Dapi l'entschatta da la partida

Gia per la terza giada a la cursa è il chanzlist da Glion Michael Spescha stà a la partenza.

Michael Spescha (42) ha gì duas incumbensas al Städtlilauf a Glion. Sper quella da far sia atgna cursa è el era stà il coach da ses figl Loris (6) che frequenta la segunda classa da scolina e ch’è partì cun ils 33 curridurs da la categoria U8. Loris ha terminà la cursa sco 9avel en la rangaziun. Michael e Loris Spescha han participà sut il num d’equipa Team Spescha. Per il bab è il mument ch’il figl è ì tras l’arrivada stà il mument da cumenzar a sa preparar per sia cursa da quatter miglias ch’è partida il suentermezdi a las tschintg. «Mia preparaziun succeda ils mais d’enviern cun sa preparar per las concurrenzas da passlung sco per exempel per il Maraton da skis engiadinais. Gea, quai constat: jau ma prepar per currer cun far passlung.» A currer propi va Michael Spescha mo intginas giadas avant ch’ir ad ina cursa. Uschiglio è ses sport da stad ir cun velo.

Quest schanugl ha el donnegià avant blers onns cun dar ballape. Sin ils skis da passlung e cun ir cun velo na senta el nagut, declera Michael Spescha en discurs cun la FMR.

Il motiv ch'il secretari communal dad Ilanz/Glion vul absolver il Städtlilauf è dentant il traject da cursa fitg attractiv. «Jau sun creschì si a Glion ed enconusch fitg bain la citad. Jau sun fascinà da currer quella runda tras l’entira citad veglia, tras il guaud dal Paradieswäldli e per lung dal quartier cun ils stabiliments da sport da Glion. Igl è in bel traject cun tut sias fassettas.» Michael Spescha precisescha che la participaziun a la cursa n’è betg ina obligaziun per el sco secretari communal.

Star saun e sa sentir bain

Michael Spescha fa regularmain sport. «Ina u duas giadas ad emna fatsch jau sport. La stad vom jau cun velo, mintgatant era anc la saira suenter la lavur. L’enviern vom jau gugent la saira cun skis da passlung sin la loipa, sche quella è illuminada. E lura faschain nus fitg savens sport sco famiglia la fin d’emna.» Michael Spescha dovra il moviment en la natira perquai ch’el ha sco secretari communal ina tipica professiun da seser. Michael Spescha: «Forsa che quai vesess ora auter, sche jau lavurass en in mastergn cun lavur corporala greva.» El è creschì si en ina famiglia che fascheva bler cun skis e che fascheva era sport la stad. «Jau hai dà blers onns ballape sco uffant e sco giuven. Ed oz è mia finamira quella da restar en furma e da sa sentir bain cun far sport.»

Mo betg il Gion davos

Suenter las duas rundas enturn la citad da Glion ha la FMR dumandà Michael Spescha da commentar sia cursa. «Jau crai che jau saja stà in pau pli spert che l’onn passà. Jau ma sent bain e tenor mia ura hai jau gì in bun tempo ed in bun ritmus da currer.» Da ses sentiment di Michael Spescha ch’el vegnia ad esser en la segunda mesadad da la rangaziun. «Mia finamira da betg esser il Gion davos è cuntanschida.» Quai ch'ha plaschì a Michael Spescha spezialmain bain durant currer èn ils aspectaturs per lung da l’entir traject. Quels han motivà e sustegnì tut las curriduras e tut ils curridurs. «Per mai è era quella atmosfera famigliara unica al Städtlilauf a Glion, in motiv da prender part era l’auter onn.»

Podcast RTR – Il di

La survista dal di cun las pli impurtantas novitads per tadlar curt e cumpact.

Ulteriurs audios e podcasts