Nov num, autra direcziun da musica e l'avust enstagl il mars: quest onn han ils organisaturs da l'Indoor Sounds fatg pliras midadas. Ma era quellas n'han betg purtà il success giavischà.
La fin da l'emna passada ha il comité d'organisaziun dal Indoor Sounds a Mustér decidì da chalar d'organisar il festival da musica en il Center Fontauna. Il motiv principal è la mancanza d'entradas, respectivamain il memia pitschen dumber da visitadras e visitaders.
La fin d'avust ha l'Indoor Sounds – pli baud Indoor Festival – gì lieu per la 13avla giada. 13 ch'è en bleras culturas ina cifra da disfortuna n'è lura era betg gist stada quella da fortuna per las organisaturas ed ils organisaturs dal festival da musica.
«Era quella giada n'avain nus betg gì il dumber da visitadras e visitaders giavischà. Consequentamain avain nus decidì la fin da l'emna passada da chalar d'organisar l'Indoor Sounds», di Florian Zanin, il manader dal comité. Forsa ch'insatgi auter emprovia insacura puspè d'organisar insatge sumegliant u en ina furma pli pitschna. Quai stat dentant scrit en las stailas, uschia ch'il festival è istorgia.
«Per l'Indoor Sounds da l'avust passà avain nus gì in preventiv da 160'000 francs. Enstagl da 900 entradas sco budgetà, avain nus gì mo 550 entradas pajadas. Uschia è sa dada ina perdita da radund 30'000 francs», explitgescha Florian Zanin ch'è stà 10 giadas al timun da las 13 ediziuns dal festival.
Per cuvrir la gronda part da quest deficit han ils organisaturs era stuì organisar quest onn in lotto. «Da princip na po quai gea betg esser ch'ins sto organisar in event per cuvrir il deficit da l'auter event», di il schef da l'organisaziun e punctuescha: «La motivaziun da cuntinuar n'è ussa definitivamain betg pli avant maun.»
-
Bild 1 von 1. Florian Zanin e ses comité d'organisaziun han fatg il pussaivel per garantir l'Indoor Sounds, ma las entradas per finanziar quel n'èn betg suffizientas. Bildquelle: FMR / mess a disposiziun / Public Domain.
Sper il retgav dal lotto gidan anc pitschnas reservas a far maisa schubra avant che serrar definitivamain ils cudeschs da quest arranschament. «A noss partenaris avain nus communitgà nossa decisiun.»
«Jau deploresch la fin»
Florian Zanin ch'è s'identifitgà cumplainamain sur tut ils onns cun l'Indoor Festival respectivamain l'Indoor Sounds, deplorescha ch'i na dat ussa nagut auter che da chalar cun l'organisaziun da quel: «I na marscha betg uschè bler en la regiun e per quest motiv sun jau anc adina da l'avis ch'il basegn per in tal arranschament saja avant maun.»
Or da l'archiv
Sco quai che Florian Zanin constatescha, èn ils custs generals per l'organisaziun d'in event da tala dimensiun creschids ils davos onns. Sper las pajas per las furmaziuns da musica èn era l'infrastructura e la tecnica cumbinadas cun custs considerabels: «La tecnica e las localitads èn necessarias. Procurar quellas mo per ina saira cun tutta lavur ch'i dat d'endrizzar, fa era strusch senn, uschia che almain duas sairas èn necessarias.» Tut auter che simpel saja era da recaltgar meds finanzials da sponsurs.
La vieuta n'è betg reussida
Cun la finamira da far la vieuta en il senn positiv dal festival han ils organisaturs fatg quest onn pliras midadas. D'ina vart il nov num Indoor Sounds, da l'autra vart il termin. Quel è vegnì spustà da la primavaira sin la fin d'avust. Medemamain è la direcziun musicala vegnida midada da rock e hip hop sin rock e pop.
Per attrair dapli glieud als concerts en il Center Fontauna è vegnida tschertgada ina collavuraziun cun Sedrun Mustér Turissem. L'organisaziun dal Bike Event Just Ride communablamain cun l'IMBA, l'Associaziun internaziunala da mountainbike da la Svizra, n'ha medemamain betg purtà fritg.
«Igl è sa mussà che l'interess per nossa purschida è simplamain memia pitschen, saja quai l'avust u sco pli baud la primavaira», di Florian Zanin concludend.