Il prim da fanadur 2020 ha La Conditoria Sedrun Switzerland avert ses nov bajetg da producziun. «Nus eran amez corona. Ma corona n'è betg stà il sulet che ha fatschentà nus dapi l'avertura dal manaschi, di Reto Schmid (51). Ma el ha tegnì la dira, è viagià per il mund enturn ed ha procurà per contacts impurtants. En 13 pajais ha el furnì u furnescha ses products ed uss er en Germania. «Per la stagiun da Nadal pudain nus furnir là products ad in detaglist cun 5'000 butias. Las aspectativas che nus possian producir vinavant per quest client èn fitg bunas, di il Tuatschin.
Questa incumbensa cumpensescha quella ch'era previsa oriundamain cun Costco en ils Stadis Unids da l'America. Che quest deal na saja betg reussì saja d'attribuir a la problematica da la politica da duana dals Stadis Unids da l'America.
Milliuns turtas da nuschs
Da la dimensiun da la furniziun en Germania na vul Reto Schmid betg tradir la massa, er betg davart il num dal detaglist grond, ma el di: «Igl è milli palettas cun plirs milliuns turtas da nuschs pitschnas, ma er turtas pitschnas cun autras ingredienzas. Questa empustaziun è fitg relevanta per il success da noss manaschi. Igl è per uschè dir la curuna per noss engaschi.»
Al medem detaglist possia La Conditoria Sedrun Switzerland er porscher differents products stagiunals, per exempel per Pasca, Son Valentin u il di da la mamma. «Nus essan il sulet furnitur svizzer da quest detaglist ed jau sai da bunas funtaunas che quest detaglist è fitg fidaivel a ses furniturs», punctuescha Reto Schmid. La Germania saja interessanta er or da vista da l'inflaziun che saja là il mument sin il nivel da radund 10%. En cumparegliaziun cun in'inflaziun da 2 u 3% en Svizra resulta uschia in pretsch psicologicamain attractiv. Da la Germania dettia anc in auter interessent per ses products.
Fitg blera lavur
«Nus essan il mument al cunfin da nossas capacitads», di Reto Schmid. Sper l'edifizi avert il 2020 po el uss nizzegiar in grond bajetg da scrinaria gist dasperas sco magasin. Ma era quel è gia plain pli che plain cun material e products. Quest mais producescha il manaschi 2,5 milliuns turtas pitschnas. Parallelamain marschan gia las preparativas per Nadal e lura bainbaud er per Pasca.
«L'onn passà avain nus producì in mez milliun lieurs da tschigulatta. Per las proximas Pascas vegni ad esser anc dapli. Nus avain sviluppà successivamain novs models da lieurs, tranter auter er sin giavischs spezials da la clientella.» Products da tschigulatta èn daventads in'impurtanta pitga dal manaschi e per pudair dar dumogn a questas incumbensas vegn la veglia pasternaria er a servir per quest intent en l'avegnir.
Cun 50 collavuraturas e collavuraturs è La Conditoria Sedrun Switzerland in manaschi survesaivel e quai vesa Reto Schmid sco avantatg: «Grazia a tut’infrastructura e las maschinas che nus avain installà, pudain nus resguardar er giavischs individuals da nossa clientella.»
Dischavantatg ed avantatg dal lieu
«99,5% da la svieuta che nus faschain oz na faschevan nus betg avant diesch onns», rapporta Reto Schmid. E sch'i va tenor sia veglia, duai il manaschi crescher vinavant. El na crai betg mo en sia filosofia cun products innovativs ed interessants, mabain er en il lieu sisum la Surselva: «Nus avain in dischavantatg pertutgant il lieu da producziun, ma da l’autra vart pudain nus nizzegiar quel per il marketing. Blera glieud è surstada d'udir che nus produceschian si en las muntognas. Nus pudain raquintar istorgias interessantas da la regiun cun la Tgina dal Rain e da noss manaschi sin 1'400 meters sur mar.»
Plazzas sur onn
In garant per ses success è il persunal e pertutgant quel di Reto Schmid: «Jau poss porscher plazzas sur onn ed uschia dar segirezza a las collavuraturas ed als collavuraturs.» Tuttina è el er conscient da la luna da la natira, da la tecnica e da la politica: «Curt suenter il temp da corona avain nus pudì furnir products en la Corea dal Sid. Lura è il Chanal da Suez stà serrà pervi d'in incap cun in bastiment. Il pretsch per transportar nossa rauba cun in container per mais da Sedrun en la Corea dal Sid è creschì d'in mument sin l'auter da radund 2'500 dollars sin fin 17'500 dollars. Uschia è questa incumbensa ida a fin.
Or da l'archiv