Ils svilups actuals areguard ils dazis americans sin products svizzers procuran per levgiaments en Svizra. Il Cussegl federal ha annunzià ch'ils dazis che muntavan oriundamain a 39% vegnan sbassads a maximal 15% e quai retroactiv a partir dals 14 da november.
Dazis da 15%
Reto Schmid, il mainagestiun da la «Conditoria Sedrun Switzerland», ha gia fatg experientschas negativas cun ils dazis auts ch'han chaschunà difficultads cun l'export en ils Stadis Unids. La decisiun americana da definir dazis da 39% è vegnida amez preparaziuns per in deal cun ina gronda interpresa americana ch'è planisà gia per l'onn vegnent. Dazis memia auts per ils products tuatschins.
Ma il di suenter l'annunzia da sbassar ils dazis sin 15% ha Reto Schmid gia survegnì ina dumonda da Costco che vul uss reprender la collavuraziun. Il grossist american na vul betg mo lavurar cun ina tortina, mabain cun trais differentas sorts. El è perquai optimistic, cunzunt perquai che la firma americana sa da tge dazis ch'ins discurra.
Igl è sco Nadal e forsa era Pasca ensemen sche l'emprima empustaziun vegn ed il contract è suttascrit.
Las tractativas sajan anc frestgas ed i n'è betg cler tge consequenzas finanzialas che quai vegn ad avair. L'interpresa venda ses products a Sedrun e resguarda en ses pretschs tut ils custs. Tenor Reto Schmid hajan ins avant il sbassament dals dazis americans gia survegnì ina gronda empustaziun da la China, quella n'hajan els dentant betg pudì far en il temp giavischà pervia da motivs da capacitad.
Sco in regalin da Nadal na saja il nov dazi da 15% betg, quai saja lura forsa il cas sche l'empustaziun ed il contract saja suttascrit.
Economia grischuna levgiada
Avant intgins mais ha RTR rapportà dad intginas firmas grischunas che pateschan dals dazis da quel temp. Cun dazis da be pli 15% èn bleras firmas grischunas levgiadas:
La EMS chemia scriva per exempel en in e-mail che la reducziun dal dazi saja fitg impurtanta per blers affars svizzers, relativescha dentant er ord l'atgna vista che lur products, che vegnan vendids en ils Stadis Unids, vegnian er producids per gronda part là. Las paucas excepziuns hajan ussa main dazi, quai saja bun.
La firma Truffer SA, ch'exportescha crappa natirala, avess patì dapli dals dazis auts. Tant pli grond il levgiament, ha la cumpossessura Pia Truffer declerà. Sco la Conditoria Sedrun haja er la firma Truffer SA cumenzà da diversifitgar e chattar auters martgads. Interessants sajan ils martgads asiatics sco il Giapun e la Corea dal sid, sco era l'Europa dal Nord.