Gia il december 2020 ha la Viafier Retica preschentà ils plans da la surbajegiada a la staziun da Glion.
Novs bajetgs pretendan adattaziun
La Viafier retica ha surdà la planisaziun dals novs bajetgs a la staziun a Glion al biro Giubbini Architects da Cuira. Ils dus bajetgs planisads pretendan ina adattaziun dal plan da zonas. En in bajetg datti abitaziuns en l’auter survegn la scola mercantila suttetg.
Las midadas da la planisaziun locala pertutgan las lingias da bajegiar dals dus bajetgs novs ed il nov terminal d'autos da posta che vegn stuschads pli fitg envers ost. Da nov datti en il territori Pendas, che schai da l'autra vart dals binaris, ina zona da parcar cun Park&rRide ed ina zona da temps liber. Il mument ha lieu ina exposiziun da participaziun e sche tut va tenor plan po la populaziun votar il matg a l'urna pertutgant la midada da la revisiun parziala .
Parallel cun la revisiun da la planisaziun locala ha la vischnanca da Glion era publitgà il plan da quartier per il territori pertutgà. L’approvaziun dal plan da quartier è en cumpetenza da la suprastanza communala.
Med d'urgenza
L'infurmaziun digitala ha cuzzà 40 minutas. Participà han vers 40 utilisaders. La presidenta communala, Carmelia Maissen, vesa l’occurrenza sco med d'urgenza ed ella preferescha cura ch'igl è pussaivel ils inscunters cun contact direct tiers la populaziun. Per pudair cuntinuar cun la procedura da planisaziun èsi tenor Maissen stà necessari d’infurmar la populaziun
