La situaziun dal traffic che va atras las giassas stretgas da Schluein vers il chastè dal Löwenberg n'è betg cuntentaivla. Quai san ils promoturs dal Löwenberg. Ina schliaziun na dat quai dentant betg a la sperta.
Cun las lavurs en la Val Schluein ch'èn previsas per ils proxims onns, pudessi eventualmain dar in auter access al Löwenberg. Quai è dentant anc intschert. Da l’autra vart sincereschan il promoturs, che la glieud che vegnia a sa chasar en il Löwenberg, sajan plitost persunas che na chaschunian betg grond traffic, numnadamain surtut persunas giuvnas che dovrian il traffic public.
Co vinavant?
Ina gronda chaussa en mira per il Löwenberg è l’Academia MINT che prevesa activitads per scolars da la scola primara, pia persunas che n'èn betg sin viadi cun autos.
Ch’il suveran da Schluein ha betg concedì il credit da 100'000 francs, haja er da far cun la preschentaziun da l'uniun dal Löwenberg, conceda Ralf Schlaepfer il president communal e president da l'uniun Löwenberg. La populaziun avess gugent savì pli concret, pertge che quels daners vegnian duvrads e quai na saja betg vegnì preschentà concret avunda. En cas ch'i dettia ina segunda dumonda per daners a la vischnanca, stoppian ins resguardar quest fatg, manegia Schlaepfer.
