A Glion èn duas interpresas da sepultura a la tschertga d'ina localitad per endrizzar sco stiva da morts. En quest nov local duai la famiglia en malencurada avair spazi per prender cumià da la defuncta u dal defunct, e quai en in'atmosfera digna sco quai ch'i vegniva fatg pli baud a chasa. Gia endrizzà han ils servetschs da bara da Mustér e da Cuira in local da cussegliaziun a Glion.
Il servetsch da baras Furger da Mustér ed il servetsch da baras Caprez da Cuira han chattà ina collavuraziun en Surselva. Il domicil da lur prestaziun da servetsch è Glion, nua che quellas e quels dal pli sisum da la Surselva han pli u main tuttina lunsch sco quellas e quels da Cuira per s'inscuntrar. Per sustegnair ils confamigliars ils emprims dis da malencurada avra il servetsch da baras Caprez da Cuira ina stanza da cussegliaziun ed ina stiva da morts a Glion. Melanie Hangartner, la substituta dal gestiunari da l'interpresa Caprez, di ch'ils servetschs da bara da Mustér e da Cuira mettian a disposiziun in accumpagnament facultativ per ils confamigliars. «Perder in concarstgaun è ina situaziun pretensiusa. En quel mument na dovri betg mo ina sepultura digna, mabain era in accumpagnament empatic e fin, ils dis avant il di da sepultura.»
Sligiaziun ideala
Mess en rocla l'idea per ina stiva da morts a Glion ha Rafael Monn, il gestiunari dal servetsch da baras Furgertaxi a Mustér. «Mes servetsch da baras è memia pitschen per endrizzar ina stiva da morts e per assistir als survivents u parents da la defuncta u dal defunct. Vitiers vegn che Furgertaxi a Mustér lavura anc sin auters secturs da transport e mo parzialmain sco servetsch da baras.» La filiala a Glion vegn menada da tuttas duas interpresas ensemen. Il local da cussegliaziun e la stiva da bara planisada stattan era a disposiziun a la clientella da Rafael Monn e sia firma Furgertaxi a Mustér.
Temp per prender cumià
Rafael Monn che ha surpiglià l'onn 2019 il servetsch da bara a Mustér dad Ignaz Furger di ch'il temp per prender cumià d'ina defuncta u d'in defunct manchia. Quai haja el fatg persenn pliras giadas, cura ch'el saja vegnì clamà per metter en bara insatgi. «Tranter il mument ch'jau met en bara enfin al transport en il crematori stattan fitg savens mo tschertas uras. Nossa glieud indigena n'ha oz betg la chaschun da dar adia a la defuncta u al defunct.» Ed anc pli critic saja sch'i dettia in mortori en in hotel da vacanzas e la famiglia saja en la Bassa u schizunt en l'exteriur, di Rafael Monn. «Per garantir ina pussaivladad da prender cumià sun jau sco servetsch da bara led da pudair porscher en l'avegnir in lieu da cumià a Glion.»
Betg simplamain in local
En vista al fatg che betg tuttas famiglias prendan cumià pli en ina chaplutta da morts ch'è savens affiliada a la baselgia, èn Rafael Monn dal servetsch da bara da Mustér e David Naef, il possessur dal servetsch da baras Caprez a Cuira, vegnì a la conclusiun da sa referir a la tradiziun veglia da drizzar en ina stanza sco stiva. «Pli baud avevan ins en ils vitgs ils morts a chasa en stiva enfin il di da sepultura», di Melanie Hangartner dal servetsch da baras Caprez. «A quella tradiziun sa referin nus ussa cun endrizzar in local a Glion.» E cun in local da cussegliaziun a la Via Städtli 2 stat il servetsch da cussegliaziun facultativ a disposiziun a partir dad immediat per persunas che dovrian infurmaziuns davart las pussaivladads da sepultura e las formalitads da bara, di Melanie Hangartner.
Modern e tuttina sco pli baud
«Ina stiva da morts sco prevesida a Glion, avain gia dapi blers onns a Cuira», di la substituta dal gestiunari da Caprez, servetsch da baras a Cuira. «En nossas localitads datti perfin parents dals trapassads che dorman sin il canapè en la stiva da bara. Nus dain ultra da quai la pussaivladad da malegiar sin il vaschè u da dar en il vaschè in present da cumià a la defuncta u al defunct.»
Flexibilitad è necessaria
Tenor Rafael Monn pretenda la sepultura sco tala che suonda al cumià en la stiva da morts ina gronda flexibilitad era per il servetsch da bara. «Jau hai era gia gì l'incumbensa da sutterrar in'urna siador en la muntogna, e quai senza preschientscha dals parents.» Oz datti differentas furmas da sepultura e da quellas stoppia era il servetsch da bara tegnair quint. Era perquai saja impurtant dad avair almain in lieu quiet per prender cumià e da pudair sa preparar per la sepultura. Actualmain èn ils dus servetschs da bara anc a la tschertga dad in lieu per endrizzar ina stiva da morts a Glion.