En la citad da Berna datti en tut trais santeris. Sin in da quels duai davent da l'auter onn esser pussaivel da sa laschar sepulir ensemen cun animals da chasa. Tenor il responsabel per ils curtins e santeris da la capitala, Hansjörg Engel, duai quai capitar a moda relativ simpla.
Sch’ina persuna ha il giavisch che l’animal da chasa vegn era sepuli cun ella, po ella nudar quai. Uschia po era la tschendra da l’animal vegnir sepulida en questa fossa.
Per motivs igienics stoppian ils animals dentant vegnir cremads. Uschiglio pudessi schabegiar ch'auters animals emprovan da chavar ora ils cadavers. Tar la sort d'animals ch'ins dastga prender en fossa na dettia naginas restricziuns. Chauns u giats, utschels u era reptils: Impurtant saja che la tschendra haja plaz en in vaschia da maximal tschintg liters. Hansjörg Engel è persvas che l'offerta nova a Berna vegnia a chattar in bun resun.
A Turitg datti quella pussaivladad gia dapi quatter onns. En tut ha la citad reservà 144 fossas per quest intent. Circa in quart da quellas èn actualmain occupadas u reservadas. Il resun saja positiv, di Samuel Müller da l’uffizi da sepultura da la citad da Turitg: «Las reacziuns èn per il pli engraziaivlas, perfin commoventas. La purschida tutga propi il spiert dal temp.»
Cuira è pli strict
Autra è la situaziun en il Grischun, per exempel a Cuira. Bain hajan els era gia gì dumondas da confamigliars sch'i fiss pussaivel da sepulir la defuncta u il defunct ensemen cun in animal. Mo els hajan adina stuì refusar tals giavischs, di Urs Tischhauser, il manader da l'orticultura da la citad ch’è era responsabla per la gestiun dals santeris.
Il mument sa referescha la lescha mo sin persunas natiralas. Ins sto dentant sa dumandar sche quai fiss da midar en ina revisiun futura.
Ina tala revisiun pudess tenor el dentant gia bainprest vegnir actuala – betg il davos era pervia da las diversas fusiuns ch'han laschà crescher la chapitala grischuna ed uschia era augmentà il dumber da santeris. Cuira pudess pia suandar l'exempel da Turitg e Berna ed era lubir che Stella u Simba vegnan sepulids ensemen cun lur patrun u lur patruna.
Novitads, eveniments ed istorgias interessantas ord tut la Svizra: Ina survista da noss artitgels cun focus Svizra chattais vus qua.