La trumpada era gronda suenter che la possessura da la stizun a Curaglia, Anna Acton, ha stuì communitgar l’entschatta november da serrar la stizun. Las entradas na constettian betg pli e perquai na dettia quai nagin avegnir per la stizun. Sinaquai era sa furmà ina gruppaziun cun la finamira da puspè porscher ina stizun a las Medelinas ed als Medelins.
Al cumenzament eran las convischinas ed ils convischins sceptics ma cura ch’ins haja sentì che quai è pussaivel è l’uniun cooperativa vegnida fundada il mars, di Gabriel Venzin. Il mument hajan ins quasi 200 commembras e commembers e quai saja fitg legraivel. Era la suprastanza saja sa furmada ed il mument sajan els en trais che tirian la suga. Ma els tschertgian activ anc dapli persunas per la suprastanza era per far pli divers questa ed els sperian fitg da chattar anc duas persunas, uschia Gabriel Venzin che fa part a la suprastanza ensemen cun Werner Venzin e Gion Bass. Alura sa gida era Rolf Schilling en l’administraziun. Ch'i è ina societad cooperativa saja era la differenza tar las stizuns avant, la responsabladad saja repartida sin plirs, era la finanziala, di Gabriel Venzin.
Lavurs d'endrizzar ed organisar
Las preparativas per pudair avrir la stizun èn per gronda part fatgas. La vischnanca da Medel ha renovà las localitads e sco Gabriel Venzin ha sincerà vesia tut ora auter ch’en la stizun veglia. Previs è era d’endrizzar in pitschen café cun pliras maisas a l’entrada. Uss haja quai num dad anc endrizzar tut e far las scolaziuns era en connex cun las purschidas da posta che restan en las localitads. Era hajan ins chattà persunal qualifitgà, quai saja stà ina sfida e la finala era in premissa per insumma pudair realisar ina stizun nova. Cun Laurenz Rohrbach e Melanie Marmi hajan ins chattà persunas ch’abitan gia en la regiun e ch'hajan era las scolaziuns necessarias, uschia Gabriel Venzin.
Ponderà da far sistem digital
Suenter che bleras stizuns pitschnas han tschernì la via da far accessibla digital lur stizun, 24 uras e 7 dis, han era ils responsabels da la societad cooperativa «Pro stizun Val Medel» fatg quellas ponderaziuns. Il mument sajan els dentant sa decidids da far ina stizun convenziunala. En in segund pass vegnian els a far era il pass en la digitalisaziun e porscher l’access da tut il temp a la stizun. Ma co lez models pon alura vesair ora na saja anc betg discutà e madir, di Gabriel Venzin. Il mument sa concentreschian els sin l’avertura la sonda da l'entschatta fanadur e tut l’auter vegnia a sa mussar.