Siglir tar il cuntegn

Header

audio
Pro Stizun Val Medel infurmescha davart proxims pass
Or da Actualitad dals 30.12.2022. Maletg: RTR
laschar ir. Durada: 3 minutas 31 Secundas.
cuntegn

Val Medel La stizun a Curaglia ha in futur

Ils 29 da december ha la gruppa da lavur “Pro Associaziun Stizun” infurmà la populaziun en la Val Medel. Durant l’occurrenza d’infurmaziun ha ella preschentà ils proxims pass en connex cun la stizun a Curaglia.

Uss datti definitiv in avegnir per la stizun dal vitg a Curaglia. Suenter che la stizun ha stuì serrar, ha la gruppa  «Pro Stizun Val Medel» lavurà per chattar ina via da tuttina savair tener la stizun en il vitg. Uschia vegn mez favrer 2023 fundà ina cooperativa.

La stad da l’onn a vegnir avra la stizun sias portas, uschia il manader da la gruppa da lavur, Gabriel Venzin. Enfin là èsi anc bler da far. D’ina vart tschertgan ils responsabel anc sponsurs e societars che san cumprar scrits da participaziun a 200 francs. Da tschella vart stoppian els persvader la populaziun da la necessitad d’ina tala stizun. Il resun è stà gronds tar la glieud: rodund 70 persunas en stadas a l’infurmaziun.

Il pli grond agid finanzial ha la cooperativa survegnì da la vischnanca Medel Lucmagn. Cun CHF 142’000 francs sa participescha la vischnanca en investiziuns inizialas e scrits da participaziun. Il president communal da Medel Lucmagn, Claudio Simonet, di che la vischnanca haja gì a l’entschatta dubis sch’ella vul suenter il naufragi da la stizun veglia sa participar. La cifras stoppian constar e quai è er ina sfida per la cooperativa.

Uss tschertga la gruppa da lavur anc pliras suprastants e suprastantas. Vinavant vegn ella ad elavurar in concept ed in plan da fatschenta. Ina mainagestiun saja en vista, di Gabriel Venzin.

RTR novitads 17:00;

Artitgels legids il pli savens

Scrollar a sanestra Scrollar a dretga